Kryeplaku fyen kryekomunarin

Një sherr mes kryetarit të Komunës Luz i Vogël në Kavajë
dhe kryeplakut të fshatit ka përfunduar në fyerje dhe
ofendime. Ngjarja ka ndodhur para dy ditësh, ndërkohë që
policia ka dërguar për ndjekje penale kryeplakun Hekuran
Stambolli, i cili është denoncuar nga Hajrulla Tafa. Sipas të
dhënave zyrtare të policisë, ka filluar procedimi penal në
gjendje të lirë për 40-vjeçarin Stambolli, banues në fshatin
Luz i Vogël, me detyrë kryeplaku i fshatit, sepse rreth orës
17:53, për motive të dobëta dhe për shkak të detyrës, ka
fyer nëpërmjet telefonit, Hajrulla Tafën, me detyrë kryetar
i komunës. Sipas policisë, menjëherë pas kësaj ngjarjeje,
Tafa ka denoncuar këtë fakt dhe pas kryerjes së veprimeve
hetimore, është vendosur që dosja të dërgohet në prokurori
për kundërvajtjen penale të "fyerjes".