Kryesia socialiste mblidhet në Bubullimë

• Kreu socialist ka mbledhur dje kryesinë socialiste në komunën Bubullimë të rrethit të Lushnjës.Pas mbledhjes së një jave më parë në qytetin e Burrelit, kryesia miratoi materialet që do të diskutohen në mbledhjen e Asamblesë Kombëtare të datës 22 dhjetor. Dje, Rama ka prezantuar dhe Enciklikën e III të Bujqësisë, ku ka nënvizuar se "prodhimi bujqësor është në nivelin e rreth 50% të atij të para viteve '90-të. Blegtoria ndodhet ende në kushte ekstensive, ndërkohë që popullsia rritet në mënyrë dinamike dhe bashkë me të shumëfishohet konsumi". Ky dokument, telegrafikisht pasqyron vetëm etapën e parë të programit tonë, ndër katër gjithsej, nëpër të cilat ai do të kalojë deri në maturimin e tij. Kjo fazë shërbeu për inventarizimin e situatës dhe evidentimin e problematikës në terren, duke sensibilizuar njëkohësisht shoqërinë për nevojën e një Politikë të re, që buron nga problemet e njerëzve dhe është në shërbim të tyre. "Fshati shqiptar përfaqëson një potencial njerëzish dhe burimesh natyrore shumë të rëndësishëm për ekonominë dhe zhvillimin tonë shoqëror", tha Rama.