Kualifikimi i Kamzës, fryti dimëror i Pemës

Nga ILIR CARA

Kamzalinjtë arrijnë një fitore tenistike me pogradecarët dhe falë golaverazhit më të mirë përparojnë në Kupë para Teutës

Kamza Pogradeci  6-0

Shënues: Pema 26, 62, 80, 87 F. Tafaj 36, Belçev 52

Kamza: Haxho, F. Tafaj, Ndreka, Ardit Beqiri, Hallaçi, Belçev (Mici 66), Capa, Manuka (Ardian Beqiri 83), E. Tafaj, Karapici (Kënga 85), Pema. Trajner: E. Gjoka

Pogradeci: Petrovski, Binishi, Miklovan, Larti, Drazhanin, G.Çekiçi, Baze (Çajku 83), Zguro (Likollari 55), A. Çekiçi, Çela, Laçka. Trajner: A. Sadikaj.

Gjyqtarë: K. Cjapi, I. Tartari, N. Rrapaj  (Fier)

Kartonë të verdhë: F. Tafaj, Baze, Çela

Kamza nuk rezervoi asgjë dje ndaj Pogradecit dhe trajneri Ernest Gjoka hodhi në fushën e lojës formacionin-tip, pasi kërkohej një fitore e thellë për tu kualifikuar në kupë. Ndërsa pogradecarët dukej qartë se këtë transfertë e kishin angari, pasi ishin të përqendruar vetëm tek ndeshja e radhës në kampionat. Kamza ka arritur një fitore tenistike 6-0 ndaj Pogradecit dhe falë golaverazhit më të mirë kamzalinjtë rreshtohen mes tetë skuadarve më të mira të Kupës së Shqipërisë.

Emocionet dhe tensioni i brendshëm dukej qartë te drejtuesit e Kamzës, pasi fati i tyre varej edhe nga ndeshja e Durrësit mes Teutës dhe Flamurtarit. I gjithë takimi i djeshëm ëshët luajtur me një portë ku tablloja ishte e qartë me një Kamëz që sulmonte me forca të shumta dhe e uritur për të shënuar sa më shumë gola. Protagonist i këtij kualifikimi ishte sulmuesi Eleandro Pema, i cili lëshoi katër kokrra në rrjetën pogradecare.

Përpos rasteve të shumta për shënim, goli i parë për kamzalinjtë vjen në minutën e 26-të, kur Pema shënon me kokë. Në minutën e 36-të kapiteni Tafaj, i ndodhur në pozicionin e duhur shumë pranë portës, e shtyn topin në rrjetë, 2-0. Me këtë rezultat mbyllet pjesa e parë. Në të dytën vijon festivali i golave të Kamzës.

Në minutën e 52-të Belçev shënon golin e tretë. Më pas vjen një tregolësh tjetër i Pemës, që në minutat 62, 80 dhe 87 nuk e ka të vështirë të shënojë. Ky kualifikim i Kamzës është një tjetër arritje historike për debutuesit e superligës. Pogradecarët dukej qartë se ishin të pamotivuar dhe as që e kishin mendjen tek kjo përballje, pasi pas ndeshjes u tha se ata mendojnë vetëm sfidën me Skënderbeun.

Ernest Gjoka, trajner i Kamzës: Morëm atë që deshim, një fitore që na kualifikon për në turin tjetër. Natyrisht që ky është një sukses, që e kemi kërkuar që në fillim dhe me atë që kemi treguar në grup ia kemi arritur. Tani do të mendojmë për finalen, për ndeshjen e fundit të këtij viti me Tiranën, ku shpresojmë ti bëjmë një mbyllje sa më të mirë fazës së parë.

Armand Sadikaj, zv.trajner i Pogradecit: Nuk kishim synime në kupë dhe gjithë vëmendja jonë është e përqendruar në kampionat, kështu që më shumë po mendonim për takimin e së premtes me Skënderbeun. Ndaj Kamzës aktivizuam disa të rinj dhe ata që kanë pasur më pak hapësirë, kështu që rezultati nuk ka shumë vlerë për ne.