Kung Fu Fetel

Në pritje të Çmimit të Madh të Kinës në Formula 1, kampioni i botës ka kohë të merret edhe më ndonjë kënaqësi tjetër. Sebastian Fetel u bë protagonist i skenave të një filmi mbi artet marciale, saktësisht të kung fusë kineze, bashkë me aktoren dhe modelen Selina Xhejd. Filmi ka të bëjë pikërisht me 24-vjeçarin dhe quhet “Kung Fu Fetel - Pilotimi i Dragoit”. Në përfundim, piloti gjerman mbeti shumë i habitur nga përvoja e tij e re.

 “Ishte e habitshme sesa shumë njerëz ishin në skenë, sa shumë punë duhet për të bashkuar copëzat. Për vetëm 2 minuta sekuencë duhet kaq shumë punë. Nuk ishte e lehtë për mua të përshtatesha. Duhet të manovroja dhe kjo të mendosh se ajo e bën këtë punë gjatë gjithë kohës”, u shpreh Fetel. 

Duke i kthyer reston, Seb e mësoi Selinën të drejtonte një makinë në pistë, duke qenë në rolin e pilotit ndihmës. Aktorja tregon sesi u ndje në testin e shpejtësisë.

“Isha pak nervoze para se të vija në pistë. Nuk isha nervoze nëse do të isha në rolin e pasagjerit, jam shumë e lumtur në këtë rol, por isha nervoze për të pilotuar ndërsa do të ishte ai në karriken e pasagjerit. Por, ai është shumë bashkëpunues, më mësoi shumë gjëra. Nuk e kisha kuptuar se ishte diçka kaq delikate”, deklaroi Xhejd. 

Ndoshta kung fuja mund ta frymëzojë Fetelin që të rikthehet tek fitoret pasi nuk ka arritur të triumfojë në asnjë prej 2 garave të këtij sezoni, duke qenë i gjashti në renditje.