Kupa vë përballë Trepçën ’89 dhe Hysin

Të premten në Federatën e Futbollit të Kosovës (FFK) është tërhequr shorti për përcaktimin e çifteve gjysmëfinaliste të Kupës së Kosovës në futboll. Kandidati për titull të kampionit dhe Kupë, Trepça ’89 do të ketë punë të vështirë në këtë fazë.

‘Xehetarët’ finalen do ta kërkojnë përballë kampionit në fuqi, Hysit. Ky i fundit takimin e parë do ta zhvillojë si mysafir i ekipit mitrovicas, kurse ndeshjen e kthimit do ta zhvillojë në shtëpi, respektivisht në Merdarë. Përballja mes mitrovicasve e llapjanëve konsiderohet si finale para finales.

Në gjysmëfinale punë më të lehtë do të ketë kandidati tjetër për titull e Kupë, Prishtina, e cila depërtimin në finale do ta kërkojë në përballje me ekipin e Ligës së Parë, Ferizajn. Dueli i parë mes tyre zhvillohet në kryeqytet, kurse loja e kthimit luhet në Ferizaj.

Në fakt, dy duelet e para gjysmëfinale zhvillohen të mërkurën e ardhshme prej orës 16:00, kurse ndeshjet e kthimit luhen pas tri javësh.

Çiftet gjysmëfinaliste të Kupës

Trepça ’89 – Hysi

Prishtina - Ferizaj