Kuvendi mblidhet në seancë të jashtëzakonshme, opozita ngjitet edhe më shumë pas sjelljes antishqiptare

Për Edvin Kristaq Ramën nuk mjafton gjendja e rënduar e qindra familjeve në qarkun e Shkodrës, pa shqyrtuar më parë interesat e tij personale, çka e imponon të përforcojë qëndrimin e bojkotit të parlamentit. Një vendim i marrë në kushte personale, për shkak të rrezikut evident për humbjen e drejtimit të partisë, bojkoti i punimeve të parlamentit, u kthye për Edvinin në synimin kryesor të nekropolitikës avangarde. Kësisoj, opozita shqiptare ka vendosur që as sot në mbledhjen e jashtëzakonshme të parlamentit, me diskutime për situatën e emergjencës në Shkodër, të mos marrë pjesë, duke u faktuar edhe njëherë se nuk shqetësohet fort për fatet e vendit dhe të shqiptarëve në tërësi. Seanca e parë plenare e Kuvendit për këtë vit u konfirmua nga kryetarja e Kuvendit, Jozefina Topalli se do jetë e jashtëzakonshme, pas një kërkese të deputetëve të opozitës, në kuadrin e situatës së rëndë të përmbytjeve që karakterizoi vendin javët e para të 2010-ës. Ajo është parashikuar të mbahet sot në orën 17.00 dhe gjatë saj, pritet që deputetët të marrin në diskutim dhe analizim gjithë detajet e përmbytjeve të ndodhura në Shkodër dhe Lezhë. Ndërkaq, pavarësisht faktit se kryeparlamentarja Topalli ka deklaruar se kjo seancë do mbahet me kërkesë të disa deputetëve të opozitës, është paralajmëruar se të zgjedhurit e Partisë Socialiste nuk do të jenë sot të pranishëm në Kuvend ndërsa do të merret në shqyrtim kërkesa e tyre. Gjatë javës së kaluar nga deputeti Ilir Beqja, si përfaqësues i zonës së Shkodrës në Kuvend, pati një interesim të madh për të marrë në shqyrtim gjithë atë që ndodhi me përmbytjet, gjë e cila sipas tij u shkaktua vetëm për faj të qeverisë dhe askujt tjetër. Por prania e tij në Kuvend, qoftë edhe për të sqaruar këtë situatë u kundërshtua nga kryetari socialist Rama dhe pritet që sot në Kuvend të mos ketë asnjë opozitar në këtë seancë të jashtëzakonshme mbi përmbytjet....