LSI: Transparencë në lëshimin e kartave të identitetit

Nënkryetari i Lëvizjes Socialiste për Integrim, Sokol Axhemi, i kërkoi qeverisë dhe strukturave shtetërore të bëjnë transparente procedurën e lëshimit të kartave të identitetit. Në një prononcim për mediat, drejtuesi i LSI-së konstatoi se zvarritja e këtij procesi rrezikon standardet e zgjedhjeve të ardhshme parlamentare. "Pajisja e shqiptarëve me karta identiteti është dhe një ndër kushtet e vendosura nga ndërkombëtarët për garantimin e zgjedhjeve të lira dhe të ndershme", theksoi Axhemi. Ne si LSI, këmbënguli ai, kërkojmë transparencë parlamentare dhe publike për ecurinë e këtij procesi. Bazuar mbi atë çka është programuar në Kodin e Ri Zgjedhor, rezulton se për zgjedhjet e Kuvendit të vitit 2009, zgjedhësit do të votojnë edhe me pasaporta të lëshuara për jashtë vendit. Për këtë qëllim, ngarkohet Këshilli i Ministrave të nxjerrë aktet nënligjorë që bëjnë të mundur pajisjen me përparësi të zgjedhësve që nuk disponojnë pasaporta të vlefshme, me karta të identitetit të lëshuara në zbatim të ligjit.