LSI-ja divorc me PS-në. Rama: “Nuk eshte koha e ndarjeve”

Meta: “PS-ja abuzoi me reformën zgjedhore, do të shkëputemi”. Koalicioni i ri “E majta për integrim” mbështetet nga PAD-ja dhe PDS-ja
Shaban Sulçe

Lëvizja Socialiste për Integrim ka shpallur dje divorcin zyrtar me Partinë Socialiste. Në emër të LSI-së, kryetari i saj, Ilir Meta, u ka bërë ftesë të gjitha partive të majta dhe shqiptarëve që të bashkohen në koalicionin e ri opozitar të kryesuar nga LSI-ja, i cili do të quhet “E majta për integrim”.
“Në kushtet e inekzistencës dhe prishjes së njëanshme nga PS-ja të koalicionit të vjetër opozitar, në emër të kryesisë së LSI-së iniciojmë ndërtimin e koalicionit të ri opozitar "E majta për integrim", i cili do të synojë integrimin dhe përfaqësimin e të gjitha kontributeve të të gjithë shqiptarëve që besojnë te vlerat e vërteta të së majtës, progresit dhe integrimit”, - deklaroi Meta.
Shkaqet
Shkaku kryesor i divorcit të LSI-së me Partinë Socialiste është i lidhur ngushtësisht me përplasjet dhe mosmarrëveshjet për çështjen e reformës zgjedhore. Meta fajësoi PS-në se së bashku me Partinë Demokratike po zvarrisin qëllimisht reformën zgjedhore dhe po e përdorin atë për interesat e ngushta personale.
“Në mënyrë të përsëritur kemi kërkuar arritjen e një konsensusi midis partive të opozitës si dhe kemi kërkuar shpeshherë mbledhjen e Komisionit Parlamentar për Reformën Zgjedhore. Por, në vend të gjetjes së një konsensusi sa më të gjerë brenda opozitës dhe brenda vetë komisionit parlamentar pozitë-opozitë, lidershipi i PS-së ka zgjedhur bojkotimin e koalicionit opozitar, si dhe bllokimin e programuar të Komisionit Parlamentar për Reformën zgjedhore duke preferuar koalicionin e mbyllur "të listave të mbyllura" dhe "interesave të mbyllura" të lidershipit PD-PS.
Ndaj LSI-ja ndien përgjegjësitë e saj publike dhe kombëtare për të denoncuar këtë rrezik që i kanoset demokracisë dhe integrimit të vendit nga riciklimi i lojërave të përsëritura dhe me kosto të jashtëzakonshme për demokracinë dhe stabilititetin politik të vendit”, - tha Meta.
Vendimi
Vendimi i LSI-së është marrë pas mbledhjes së kryesisë së kësaj partie, e cila ka analizuar me shqetësim zvarritjen e reformës zgjedhore nga ana e dy partive të mëdha. Pas diskutimit në këtë mbledhje, kryesia e LSI-së ka dalë në konkluzionet se koalicioni opozitar ka pushuar së funksionuari që pas zgjedhjeve vendore të 18 shkurtit të vitit 2007 dhe për këtë përgjegjësia kryesore është e lidershipit të Partisë Socialiste. Sipas Metës: “Vendimet e rëndësishme për çështje madhore politike dhe të reformave janë marrë sistematikisht në mënyrë të njëanshme. Bashkëpunimi i hapur dhe luajal midis opozitës për hir të reformave madhore integruese është kthyer në një lidhje jotransparente dhe personale mes lidershipit të PS-së dhe PD-së”, - tha kryetari i LSI-së.
Riformatimi
Kryetari i LSI-së tha se krijimi i koalicionit të ri, “E majta për integrim”, do të ndikojë në fuqizimin e të majtës në Shqipëri.
“LSI-ja beson se jo vetëm politika shqiptare, por edhe e majta në përgjithësi, që sot hyn në një fazë të re cilësore dhe vendimtare për të ardhmen”, - tha Meta. Ndërkohë, reagimet e para pozitive pas shpalljes së nismës së LSI-së kanë qenë nga dy partitë e së majtës, PDS dhe PAD. Burime të sigurta bëjnë të ditur se shumë shpejt këto dy parti do t’i bashkohen zyrtarisht koalicionit të ri “E majta për integrim”.

22 Shkurt 2008