Lazio insiston për Hetemajn

Përparim Hetemaj mund të ndërrojë mjedis gjatë kësaj vere, edhe pse muaj më parë kishte vendosur që edhe sezonin e ri t’i mbrojë ngjyrat e Chievos. Skuadra e Lazios sërish është hedhur në sulm që t’i sigurojë shërbimet e mesfushorit kosovar.

Sipas mediave italiane, skuadra e Chievos po kërkon sulmuesin e ri të Lazios, Emiliano Alfaro. Por drejtuesit e ekipit nga qyteti romak po synojnë që këtë futbollist mos ta shesin, por ta shkëmbejnë me Hetemajn.

Mediat italiane shkruajnë se drejtori sportiv i Lazios, Igli Tare nga java e ardhshme mund t’i rifillojnë bisedimet me Chievon për Emiliano Alfaron dhe Përparim Hetemajn. I pari vlerësohet nga Lazio 3.5 milionë euro derisa Chievo kartonin e mesfushorit nga Skenderaj e shet për 4 milionë euro.

Edhe gjatë verës së vitit të kaluar, Lazio ishte e interesuar për shërbimet e Hetemajt, por ky i fundit nga Brecsia ishte transferuar në Chievo, ku sezonin e kaluar tregoi paraqitje të mira. Ish-mesfushori i AEK’ut, Twentes dhe Helsinkit, nëse i bashkohet Lazios, aty do ta takojë bashkëkombasin e tij, Lorik Cana.