Lë teserën, PS sulmon kreun e PBDNJ

28/05/2005  Një ish-anëtar i Partisë Socialiste është pre e dhunës së simpatizantëve të kësaj partie pasi ka ndërruar teserën e PS-së me atë të Partisë Bashkimi për të Drejtat e Njeriut. Ngjarja ka ndodhur në fshatin Lipe të Përmetit, kur shtetasi Janaq Toto, pasi ka dorëzuar teserën e PS-së, është regjistruar si anëtar u PBDNJ-së, duke u bërë dhe kreu i kësaj partie në komunën e Petranit. Krerët e degës së PBDNJ-së së Përmetit e kanë dënuar këtë akt, duke e konsideruar në të drejtë demokratike të çdo qytetari të bëjë zgjedhjet e veta politike dhe partiake. Në përgjithësi, Përmeti është një qytet ku fushatat elektorale kanë kaluar pa incidente dhe ky është konsideruar një rast i pazakontë për banorët e zonës. Në zgjedhjet e ardhshme parlamentare, PBDNJ ka deklaruar se do të kandidojë më vete në 100 zonat elektorale, pavarësisht se në këto katër vjet ka qenë në koalicion qeverisës me Partinë Socialiste.