Ligji për Prokurorinë, Braho: PS të mos bëjë pazar me Qeverinë

 

Lëvizja Socialiste për Integrim harton një draft të saj për funksionimin e Prokurorisë. Projektligji është bërë prezent dje në një konferencë për shtyp nga ana e deputetit të LSI-së, juristit, Spartak Braho, i cili bëri të ditur se ekspertët e partisë së tij e kanë përfunduar atë. "Do t'i niset organeve të interesuara, si Presidencës, Prokurorisë së Përgjithshme, Ministrisë së Drejtësisë, Kuvendit të Shqipërisë, Shoqatës së Prokurorëve, EURALIUS-it, ambasadës të SHBA-së", deklaroi dje Braho. Ai theksoi se, "ky ekzekutiv nuk ka më të drejtë morale të hartojë dhe të paraqesë ligjin "Për Prokurorinë", pasi ka konflikt interesash sa kohë që 3 apo 4 ministra të kabinetit "Berisha" dhe dhjetëra funksionarë të tjerë të piramidës shtetërore, janë nën hetim nga organi i Prokurorisë". LSI-ja edhe njëherë tërheq vëmendjen dhe denoncon këto synime të mbrapshta dhe tentativa të maxhorancës, duke theksuar se vendit i duhet një Prokurori e fortë, e pavarur tërësisht, me integritet dhe efikase në luftën kundër krimit. Për Brahon drafti ilegal i Ministrisë së Drejtësisë i qarkulluar nën dorë shkel parimet bazë të organit të Prokurorisë si pavarësinë, funksionet bazë të saj; nëpërkëmb dhe dobëson këtë organ duke synuar ta kthejë në një vegël të qeverisë. "Qëllimisht kjo ministri nuk ka marrë parasysh sugjerimet dhe vërejtjet e organizmave ndërkombëtare si EURALIUS, OBDAT, për çështjet themelore të ligjit duke i shmangur ato. Qëllimisht kjo ministri ka punuar në fshehtësi duke shmangur gjithë faktorët e interesuar, i ka munguar transparenca aq sa sot e kësaj dite Prokuroria e Përgjithshme nuk ka projekt zyrtar", deklaroi deputeti i LSI-së. Sipas tij, nuk mund të pranohet ideja dhe synimi i Ministrisë së Drejtësisë për të rritur ndikimin direkt të saj, në strukturën e Këshillit të Prokurorisë, si dhe të eliminohet prezenca aktive e përfaqësuesit të Presidentit. "Ne i drejtohemi gjithë faktorit politik dhe në mënyrë të veçantë grupit të PS-së, që të mos bëhet pjesë e pazareve, por të bëhet pjesë e synimit të ruajtjes së pavarësisë së Prokurorisë, forcimit të integritetit dhe efikasitetit të saj në luftën kundër krimit gjatë hartimit dhe miratimit të ligjit për Prokurorinë", theksoi Braho.