Lufta kundër drogës, SHBA rrisin investimet

Sekretarja amerikane e Shtetit, Hillary Clinton ka bërë thirrje për më shumë ndihma të huaja për të luftuar kartelet e drogës në Amerikën Qendrore. Clinton tha në një konferencë mbi sigurinë në Guatemalë se Shtetet e Bashkuara do ta rrisin ndihmën e tyre me mbi 10 për qind, duke e çuar afërsisht në 300 milionë dollarë.

Analistët thonë se shifra është ende e vogël, duke pasur parasysh se mbi dy të tretat e kokainës që dërgohen nga Amerika e Jugut drejt SHBA kalojnë përmes Amerikës Qendrore.

Në total, vendet pjesëmarrëse ranë dakord për investimin e 1.8 miliard dollarëve për mbështetjen e sigurisë në rajon.

Banka Botërore do të sigurojë 1 miliard në vitet e ardhshme, ka bërë të ditur Pamela Cox, nëndrejtoresha e degës së bankës për Amerikën Latine.