Luhet sot supersfida e Serise A

 Njihet si “Derbi i Italisë”, por ndeshja ndërmjet Juventusit dhe Interit është edhe sfida e urrejtjes. Dy armikët e periudhës “Calciopoli” do të luajnë sot në takimin që mbyll javën e 29-të të Serisë A italiane, por me role të përmbysura. Nëse vjet Interi luftonte për titullin ndërsa Juventusi ndodhej shumë poshtë në klasifikim, skenari ka ndryshuar dhe janë bardhezinjtë ata që pretendojnë, ndërkohë që zikaltërit kërkojnë një fitore që do të shërbente si katalizator për të shpëtuar sezonin.

Skuadra e Antonio Kontes do të kërkojë ti përgjigjet fitores së Milanit dhe të mbajë hapin me kryesuesit e kampionatit dhe për këtë arsye “Zonja e Vjetër” pritet të luajë me tre sulmues, ku Vuçiniç dhe Pepe do të jenë përkrah Matrit. Edhe pse Juve cilësohet favorite, trajneri Konte i ka të qarta vështirësitë e sfidës. “Interi do të luajë ndeshjen e jetës, nuk ka dyshim, sqaroi tekniku bardhezi. Duam apo sduam, kjo është një ndeshje shumë e pritur edhe nga tifozët e tyre”. 

Në anën tjetër, Interi paraqitet në Torino pa Sneijder, ndërsa në sulm do të luajnë Milito e Forlan. Por, pavarësisht situatës së vështirë dhe kërkesës së presidentit Morati për fitore, trajneri Ranieri kërkon ta kalojë presionin te kundërshtarët. “Ky është një derbi i vërtetë, unë e di mirë, pasi kam qenë edhe në kampin tjetër, tha ai. Mendoj se Juventusi rrezikon më shumë, sepse nëse bën një hap fals shkëputet nga Milani. Gjithashtu ata i tremben faktit që mund të pësojnë humbjen e parë në stadiumin e ri pikërisht nga Interi”. 

Më mbrapa në këtë sfidë nuk duan të mbeten as tifozët. Mbështetësit e Juventusit kanë premtuar një koreografi “spektakolare” dhe “të parealizuar më parë”. Spektakli në tribunat e “Juventus stadium” pritet të jetë disa herë më I madh se në takimet e tjera, ndërsa nuk do të mbetet pa u prekur edhe tema e “Calciopoli”-t si edhe fakti që titujt e fituar nga bardhezinjtë janë 29 dhe jo 27.