Lushnja, grupi i lojtarëve ende i paplotësuar

Nga JULIAN KASAPI

Lushnja ka mbyllur javën përgatitore me një miqësore, të cilën e ka luajtur në Durrës me skuadrën e Teutës. Skuadra e drejtuar nga trajneri Bano gjatë kësaj periudhe ka përparuar në aspektin tekniko-taktik dhe ka lënë pas atë të ngarkesave fizike në mënyrën më të mirë të duhur. Kontingjenti i verdhjeshilëve, tashmë duket se është në gjendje të përballet me çdo kundërshtar të kalibrit të tij. Përgatitjet intensive dhe merkatoja e zhvilluar kanë qenë të gjitha në kuadër të një synimi të vetëm, atë të ngjitjes në Superligë. Donatorët e skuadrës po i qëndrojnë shumë pranë futbollistëve dhe stafit teknik për arritjen e objektivave. Nga ana tjetër edhe presidenca e klubit e drejtuar nga kryebashkiaku Fatos Tushe ka garantuar, se financat do të jenë të sigurta për sezonin futbollistik 2012-2013. Grupi i lojtarëve, sipas stafit teknik nuk është plotësuar ende, pasi kërkohet ende një sulmues. Canka dhe Galica kërkojnë mbështetje nga një tjetër lojtar i repartit ku ata aktivizohen, pasi sezoni do të jetë i gjatë dhe i vështirë. Miqësorja me Teutën ka përfunduar me shifrat 2-2, ku shënues për të besuarit e trajnerit Bano kanë qenë Grizha dhe Metushi i hedhur në fushën e lojës në pjesën e dytë. Sipas numrit 1 të stolit të verdhjeshilëve, skuadra ka zhvilluar takime me nivel loje të kënaqshme edhe pse ka qenë një periudhë e ngarkuar me seanca stërvitore të lodhshme, por të domosdoshme. Ai shprehet se në ekip po  punohet për ti dhënë dorën e fundit përgatitjeve para startit të sezonit dhe për të qenë kështu të gatshëm për të përballuar me sukses sfidat që do të zhvillohen gjatë kampionatit të ri.