MASAKER për vijën e ujit, vriten dy vëllezër, plagosen tre gra e një i ri

Dikur thonin se për vijën e ujin bëhen më shumë vrasje. Aq e frikshme duket kjo shprehje sa çështë e vërtetë. Para pak kohësh u tha se një vrasje për gjakmarrje në Dukagjin ndodhi për një vijë uji. Tani një tjetër masakër në Pukë, sërish për një vijë uji

Një ngjarje e rëndë është shënuar mëngjesin e sotëm në fshatin Mardhnac në komunën Qelë në Pukë.

Dy vëllezër janë vrarë dhe katër persona janë plagosur, njëra në gjendje të rëndë.

Ngjarja e rëndë është shënuar në orët e para të mëngjesit, kur Paulin Markaj së bashku me bashkëshorten, djalin dhe nipin e tij po ktheheshin në shtëpi pasi kishin festuar ditën e Shën Palit. Kur ishin vetëm 100 metra larg banesës së vëllait të Paulinit, Hil Markaj, ata u ndeshën me pritën e burrave të fisit Përmakaj, të cilët i qëlluan me breshëri automatiku. Për pasojë humbi jetën 45-vjeçari Paulin Markaj dhe u plagos bashkëshortja dhe nipi i tij, Alfons Markaj 25 vjeç, ndërsa ka shpëtuar mrekullisht i biri.

Me të dëgjuar breshërinë e armëve, vëllai i tij Hil Markaj dhe bashkëshortja e tij doli në oborrin e shtëpisë, ku u qëllua për vdekje nga fqinjët e tij, të cilët u larguan më pas nga vendi i ngjarjes. Plumbat kapën edhe bashkëshorten e tij Anxha Markaj, e cila u plagos rëndë.

Pak orë pas ngjarjes, policia ka bërë të mundur arrestimin e shtetasit Bardhok Përmakaj, edhe ky i plagosur me disa plumba, dhe 32-vjeçarit Fran Përmakaj, ndërkohë që është vënë në ndjekje të disa anëtarëve të tjerë të fisit Përmakaj, që mendohet se kanë marrë pjesë në këtë masakër.