Maskat grabisin 5 mijë euro në një filial banke

VLORË- Grabitet një filial banke në zonën e Orizit, në qytetin e Vlorës, ndërsa nga hetimet e para dyshohet se ata kanë marrë 5 mijë euro. Ngjarja ka ndodhur rreth orës 14:00 të mesditës së djeshme, sipas dëshmitarëve, kanë qenë tre persona të cilët kanë dalë me shpejtësi nga banka dhe më pas janë larguar në drejtim të paditur. Sipas informacioneve, mosha e grabitësve ka qenë 25-30 vjeç, ku dy prej tyre ishin të veshur me kostum sportiv, ngjyrë e bardhë dhe një tjetër po me kostum sportiv, por me ngjyrë të zezë. Grabitësit ishin të maskuar e të armatosur me armë të tipit pistoletë, të cilët kanë kryer grabitjen e bankës. Ata kanë hyrë në bankë dhe nën kërcënimin e armës kanë detyruar arkëtaret të japin paratë. Ato kanë sinjalizuar policinë dhe më pas në vendin e ngjarjes kanë mbërritur efektivët e policisë që kanë kryer ekspertizat e nevojshme, për të pikasur autorët nga kamerat e sigurisë në bankë.

Rreth 5 mijë euro mendohet të jetë shumë e grabitur në bankë, ndërsa ende nuk ka asnjë të identifikuar për ngjarjen, edhe pse policia ka shoqëruar katër persona. Ky është rasti i tretë që finalizohet një vjedhje banke, ndërkohë që nuk kanë munguar edhe tentativat. Policia vijon intensivisht hetimet, ndërsa po merren në pyetje personeli i bankës, njerëzit që në atë moment kanë qenë në bankë dhe persona të bizneseve përreth saj, duke qenë se ndodhet në një zonë tejet të populluar. E.H.