Mbrojtja e mjedisit, katër landfille për përpunimin e mbetjeve urbane

Mbrojtja e mjedisit dhe e shëndetit të njerëzve nga ndotja dhe dëmtimi që shkaktohen nga mbetjet e ngurta urbane (familjare, tregtare) dhe inerte (ndërtimi dhe shkatërrimi), janë objektiv i Ministrisë së Punëve Publike, Transportit dhe Telekomunikacionit. Kjo ministri po realizon një sërë projektesh në kuadër të menaxhimit të mbetjeve të ngurta urbane. Konkretisht, për menaxhimin e mbetjeve të ngurta urbane po kryhen investime në landfillin e Bushatit, Rrëshenit, ndërsa janë drejt përfundimit studimet dhe projektet për ndërtimin e atij të Korçës dhe Beratit. Në landfillin e Bushatit, në qarkun e Shkodrës, parashikohet përpunimi i rreth 47 mijë tonëve mbetje urbane në vit, me vlerë 130 milionë lekë, investim i cili do t’i shërbehet një popullsie prej 200 000 banorësh. Deri tani janë kryer rreth 55 për qind e vëllimit të punës, ndërsa punimet do të mbyllen në fund të nëntorit të vitit 2008. Po kështu shumë shpejt pritet edhe fillimi i punimeve për ndërtimin e landfillit të Rrëshenit, me vlerë investimi prej 6 milionë lekësh nga buxheti i shtetit, i cili parashikon përpunimin e 3500 tonëve mbetje urbane në vit, dhe i shërben një popullsie prej 15 000 banorësh. Brenda këtij viti pritet përfundimi i studimit të fizibilitetit të vend-depozitimit ekzistues të qytetit të Korçës, investim që kap shifrën e 20 milionë lekëve. Nga buxheti i shtetit do të financohen 16 milionë lekë për ndërtimin e landfillit të Beratit, ndërsa brenda këtij muaji do të bëhet edhe tenderi që do të përcaktojë kompaninë që do të kryejë punimet.

17 Shtator 2008