Medvedev: Marrëveshja SHBA-Rusi afër kompletimit

Marrëveshja e re për reduktimin e armëve bërthamore është 95 për qind gati, ka deklaruar presidenti i Rusisë, Dimitri Medvedev, indikacioni ky më i qartë deri me tani se SHBA-ja dhe Rusia janë afër eliminimit të mosmarrëveshjeve në lidhje me traktatin e ri.

Medvedev tha se është optimist se marrëveshja do të arrihet dhe se është i trimëruar nga mënyra se si po rrjedhin negociatat. “Kam pritur që negociatat të zgjasin më shumë, por brenda gjashtë muajve ne kemi arritur që të formësojmë shtyllën e dokumentit”, tha Medvedev.

Negociatat në nivel të ekspertëve, në të cilat do të bisedohet për detajet përfundimtare të dokumentit, do të zhvillohen javën e ardhshme në Gjenevë.

Marrëveshja e re do të trashëgojë Traktatin për Reduktimin e Armëve Strategjike (START), të nënshkruar në vitin 1991, afati i së cilës ka skaduar më 5 dhjetor.

SHBA-ja dhe Rusia kishin shpresuar se marrëveshja do të arrihet para përfundimit të vitit të kaluar.

Përderisa shprehu optimizëm sa i përket marrëveshjes për zëvendësimin e traktatit START, Medvedev ishte i rezervuar sa i përket planeve për mbrojtje raketore.

“Është folur për forcat strategjike bërthamore, pa përmendur mbrojtjen raketore. Nëse shkrepën raketat bërthamore, atëherë mund të shkrepën edhe raketat mbrojtëse”, tha Medvedev.