Memushi kundër Bejës: Fondet të pamjaftueshme

Buxheti i 2009-ës për arsimin ka ndezur debatin në komisionin parlamentar të edukimit, ndonëse ministri i Arsimit, Fatos Beja, ka deklaruar se do të mbahet premtimi për dyfishimin e rrogës së mësuesve. Beja raportoi dje në komision, për zërat e buxhetit 2009 që lidhen me arsimin. Ai tha se buxheti për arsimin në vitin e ardhshëm do të jetë 41 miliardë e 169 milionë lekë, nga 36,9 miliardë që ai ka qenë në 2008. Nga këto, 3.2 miliardë lekë investime do të shkojnë në arsimin bazë, 912 milionë lekë në arsimin e mesëm, 1.8 miliardë investime do të shkojnë për arsimin e lartë dhe 330 milionë lekë do të jetë fondi për kërkimin shkencor. Por, rritja e buxhetit për arsimin me rreth 4 miliardë lekë dhe premtimet e shumta për investime dhe rroga të dyfishuara

kanë bërë që ish-kreu i Arsimit, Luan Memushi, të shprehet se ky është një fond i pamjaftueshëm, për të mbuluar shpenzimet dhe nevojat që ka arsimi në vend. Nga ana tjetër, kryetarja e këtij komisioni, Valentina Leskaj, kujtoi premtimin e pa mbajtur të Ministrisë së Arsimit se 40% e të rinjve do t‘i drejtoheshin arsimit profesional. Lidhur me këtë, Beja është justifikuar me faktin se të rinjtë shqiptarë duan të shkojnë të gjithë në universitete.