Meta: LSI nuk hyn kurrë në koalicion me Ramën

Kryetari i Lëvizjes Socialiste për Integrim, Ilir Meta, tha dje se Sali Berisha i dha Edi Ramës fuqinë mbi partinë e tij, ndërsa ky i fundit i ofroi fuqinë politike, me anë të nenit të mocioneve. “Me kartonat e tyre, deputetët e Partisë Socialiste që votuan në unitet të çeliktë me Sali Berishën ndryshimet kushtetuese, nuk bën gjë tjetër veçse tradhtuan ato përpjekje të qindra-mijëra socialistëve dhe progresistëve, të cilët derdhën edhe gjak në vitin 1994 për të rrëzuar thelbin e projekt-kushtetutës së Sali Berishës, thelb të cilin Sali Berisha e mori dje nga Edi Rama dhe servilët e tij, që iu është premtuar të gjithëve se do të jenë të parët në listat e mbyllura rajonale, duke ndryshuar disa nene thelbësore të Kushtetutës, që është afera më e madhe e ndodhur deri tani në jetën politike, një aferë shumë e thjeshtë, ku Sali Berisha i dha Edi Ramës një reformë zgjedhore të listave të mbyllura, në mënyrë që ai të vendosë sundimin e tij të plotë autoritar ndaj grupit të ardhshëm parlamentar të Partisë Socialiste dhe Edi Rama i dha në shkëmbim Sali Berishës të gjitha ato që donte dhe në radhë të parë, i dha një nen, sipas të cilit kryeministri jo vetëm bëhet figura më e fuqishme në vend në sistemin politik dhe institucional, por njëkohësisht bëhet dhe i praprekshëm, sepse që sot, në rast se do të ketë përpjekje nga aleatët e deritanishëm të Sali Berishës për t’u distancuar prej tij, qoftë për implikimin e tij si kryefajtori i tragjedis së Gërdecit dhe për shumë arsye të tjera, tani e tutje Sali Berisha me nenin që i dha Edi Rama, me fuqinë që i dha Edi Rama dje, me servilët e tij në grupin parlamentar të PS, i kërcënon të gjithë ata me zgjedhje të reja dhe me largimin nga jeta politike”, - tha Meta. “Ndaj, nuk mund të quhet ndryshe Kushtetuta pas ditës së djeshme dhe republika, në të cilën jetojmë, veçse Kushtetuta e Sali Ramës dhe republika e Sali Ramës, të cilët kanë vendosur të bashkëdrejtojnë dhe të ndajnë pushtetet së bashku, në kurriz të demokracisë së vendit, në kurriz të institucioneve demokratike, në kurriz të përfaqësimit të popullit shqiptar, i cili tani, sipas tyre, duhet të mbetet peng i vullnetit dhe arbitraritetit të tyre, i cili nuk ka më rol për të shprehur me votën e tij se cilët do të jenë deputetët që do ta përfaqësojnë në Kuvendin e Shqipërisë, i cili nuk ka rol as për të zgjedhur presidentin e vendit, pra simbolin e unitetit kombëtar”, - vijoi Meta.

Z. Meta, PS ju ka bërë një ftesë publike për t'u bashkuar si aleatë. A do bashkoheni ju me PS?

Nuk mund të ketë bashkim të ri me demagogun e vjetër Edi Rama dhe me sivëllaun e tij, Sali Berisha. LSI nuk hyn në koalicion me Sali Berishën. Të gjithë e dinë që Sali Berisha na ka kërkuar që edhe të zgjidhim një president nga LSI, por ne asnjëherë nuk ramë pre e diversionit të tij për të përçarë opozitën. Por, përkundrazi, ishte e vetmja forcë politike që nuk paraqiti nga opozita asnjë kandidat për këtë post, duke synuar bashkimin e opozitës. Ne nuk mund të hyjmë në një koalicion me hipokritin Edi Rama, i cili sikurse e mbani mend vinte këtu te selia e LSI apo shkonte te selia e Paskal Milos dhe Neritan Cekës, dhe te Skënder Gjinushi, për të shtyrë zgjedhjet vendore dy muaj nga tirani i votës së lirë, Sali Berisha. Për një certifikatë ne kemi shtyrë zgjedhjet një muaj, edhe pse na kritikonte Solana për këtë shtyrje, edhe pse na kërkonin ambasadorët e huaj në Tiranë që të hynim në zgjedhje, por Edi Rama nuk donte që të hynim në zgjedhje. Dhe ky njeri vete dhe bëhet me Sali Berishën kundër interesave të opozitës, por jo vetëm kaq, kundër interesave të anëtarëve dhe simpatizantëve të PS bëhet me Sali Berishën për interesat e tij dhe të Sali Berishës, për interesat e tij kundër demokracisë dhe kundër vullnetit të popullit shqiptar. Ndaj ftesa të tilla janë vetëm hipokrizi dhe demagogji. Nuk hyn LSI në koalicion me Sali Berishën, sikurse hyri Edi Rama.

Z. Meta, kur thoni se këto ndryshime do të rishikohen, çfarë nënkuptoni?

Kjo do të thotë që lufta jonë nuk do të përfundojë, derisa të rishikohen ndryshimet që kanë ndodhur dje, derisa të marrë përgjigjen e merituar puçi që është bërë dje në Kuvendin e Shqipërisë. Sepse, të ndryshosh 9 nene të Kushtetutës për më pak se 3-4 ditë, jashtë gjithë procedurave parlamentare dhe demokratike, të ndryshosh thelbin e Kushtetutës, vetëm e vetëm që Edi Rama të marrë listën e mbyllur të partisë së vet, për t’i mbyllur gojën Petro Koçit me shokë, dhe njëkohësisht që Sali Berisha të marrë një nen që është një siguresë për të që të mos ikë si kryeministër deri në fund të këtij mandati të paktën është e papranueshme. Padyshim që ne nuk mund të pranojmë që për interesa kaq të vogla, kaq personale, kaq të ndyra të pajtohemi me Kushtetutën e Sali-Ramës. Kushtetuta mund të ketë pasur dhe mund të ketë nevojë për përmirësimet e saj, por kjo do të ndodhë vetëm përmes një procesi transparent, demokratik dhe konsensual dhe do të ndodhë, duke marrë në konsideratë vullnetin e qytetarëve shqiptarë.

Z. Meta, dje, në parlament të vetmit kundështarë për këtë draft ishte LSI dhe aleatët e saj. Kemi të bëjmë këtu me një pol të tretë politik në vend?

Që sot LSI nis një aksion të madh mbarëkombëtar dhe jo e vetme, me gjithë forcat politike që janë kundër Republikës së Sali-Ramës dhe Kushtetutës së Sali-Ramës ose ndryshe të Gërdecit dhe njëkohësisht që sot, kryesia e LSI do diskutojë për situatën më të re politike në vend, do të marrë masat e saj të para dhe jemi në kontakt me të gjitha forcat politike, por edhe me aktorë të rëndësishëm politikë, edhe brenda PS ekzistuese, edhe me përfaqësues së shoqërisë civile, dhe e kemi thënë edhe më përpara që koalicioni i LSI do të jetë koalicion fitues.