Meta: Rama ka braktisur bashkinë që e mori me votat e LSI-së

Kryetari i Lëvizjes Socialiste për Integrim i kujtoi dje në një takim me gratë në Kombinat ish-aleatit të tij, Edi Rama, votat që i dha LSI-ja për t’u bërë kryetar bashkie. Duke shigjetuar bashkëpunimin e PS-së me mazhorancën, Meta vuri në dukje se Edi Rama ka braktisur punën e tij si kryebashkiak, duke mos u marrë me zgjidhjen e problemeve të kryeqytetit, si uji i pijshëm, ajri i pastër, hapësirat publike etj. “Është gjithashtu një situatë paradoksale, sepse kryetari i bashkisë e ka lënë këtë detyrë, detyrë që për hir së të vërtetës u bë me votat tona dhe të tuajat, ndërsa kryeqyteti vuan për ujin e pijshëm, për më shumë ajër të pastër, për më shumë hapësirë për fëmijët etj”, - theksoi ai. Edhe më parë, kreu i LSI-së ia ka përmendur këtë fakt ish-aleatit të tij Edi Rama. Në zgjedhjet e 2007-ës, diferenca e votave mes kandidatit të së majtës për Bashkinë e Tiranës dhe kandidatit të së djathtës ishin rreth 22 mijë vota, çka përkon me numrin e përgjithshëm të anëtarësisë së Lëvizjes Socialiste për Integrim vetëm për qytetin e Tiranës. Kjo i ka dhënë shkas kësaj partie që të mendojë se votat e saj ishin vendimtare për të rikonfirmuar fitoren e Ramës për herë të tretë në bashki. Së bashku me mosmarrëveshjet si parti politike, marrëdhëniet PS-LSI u ashpërsuan edhe për faktin se sipas LSI-së, Rama nuk mbajti premtimin për sa më shumë përfaqësi të LSI-së në Bashkinë e Tiranës, siç ishte që posti i nënkryetarit të bashkisë t’i jepej LSI-së. Kjo nuk ndodhi dhe në vazhdim, ku Meta vendosi që të dilte nga koalicioni me Ramën, denoncoi moszbatimin e marrëveshjes që kishin para zhvillimit të zgjedhjeve. Që atëherë LSI-ja e ka shtrirë sulmin e saj kundrejt Ramës të në dy drejtime, si kryetar partie dhe si kryetar bashkie. Në lidhje me drejtimin e Bashkisë së Tiranës, LSI-ja e ka akuzuar drejtuesin e bashkisë së kryeqytetit se për shkak të dhënies së lejeve të ndërtimeve pa kriter, shkaktohen përmbytje në shumë zona të Tiranës. Së fundmi Rama u akuzua se ka përdorur policinë bashkiake për të dëbuar me dhunë banorët nga shtëpitë e tyre të cilët dispononin dokumente për pronësinë qysh nga koha e Zogut.

Brokaj: Hapja e dosjeve, lojë politike

Një prej drejtuesve të LSI-së, Sabit Brokaj, mendon se rihapja e çështjes së dosjeve të spiunëve të ish-Sigurimit të Shtetit është vetëm një lojë politike e mazhorancës për të tërhequr vëmendjen nga çështje të tjera. “Unë mendoj se janë thjesht lojëra politike. Megjithëse në tragjedinë e Gërdecit, qeveria dhe Berisha u ndihmua nga Partia Socialiste, për ta zhvendosur dhe për ta minimizuar, ajo del si një problem i madh në vazhdimësi. Ndaj, kërkohet nga PD-ja që të krijojë fokuse të tjera jashtë Gërdecit, dhe këtë radhë u gjet fokusi i spiunëve”, - tha Brokaj .Më tej ai shtoi se “nuk është sot e keqja më e madhe, problemi i atyre spiunëve që kanë vdekur pothuajse 20 vjet më parë, por e keqja më e madhe e vendit janë ata politikanë që kanë futur Shqipërinë në këtë kaos, gjendje të mjerë, pa perspektivë dhe do të thosha, në dëm të interesave ndërkombëtare”.