Meta në Kashar: Fitorja në 2009, e sigurt

Lideri i Lëvizjes Socialiste për Integrim, Ilir Meta, zhvilloi një takim me strukturat e LSI-së, anëtarë dhe simpatizantë të saj në Kashar. "Ne do të kishim dëshiruar që kandidati ynë të dilte fitues në këto zgjedhje dhe jo thjesht forca e dytë politike, por kjo ka qenë një sfidë e vështirë, sepse anëtarët dhe simpatizantët tanë nuk janë ballafaquar vetëm me PD-në, por janë ballafaquar me të gjithë shtetin, sepse i gjithë shteti dhe e gjithë qeveria ka qenë në çdo moment afër qendrave të votimit, duke iu bërë presion votueseve", tha Meta. Në përfundim të këtij takimi, ai u shpreh optimist jo vetëm për suksesin e arritur në këtë komunë. "Me këtë ritëm që po punohet jo vetëm në Tiranë, por në të gjithë Shqipërinë, LSI-ja në zgjedhjet e përgjithshme të 2009-ës, do të jetë forcë e parë politike në vend", u shpreh Meta. Kreu i LSI-së këmbënguli se kjo parti është një forcë politike opozitare, që Sali Berisha nuk ka ku ta kapë, nuk ka si ta trembë. "Në sistemin e ri të zgjedhjeve, që është ai proporcional, LSI-ja i ka të gjitha shanset që të arrijë një rezultat spektakolar, duke na bërë një forcë kryesore, vendimtare në qeverisjen e ardhshme të vendit", premtoi Meta. Sipas tij, kjo parti nuk do të jetë në shërbim të një kaste, por një qeverisje në shërbim të forcimit të shtetit të së drejtës.