Meta prezanton kandidatët për deputetë, në Bulqizë Ilir Balla dhe në Mat Agim Hysa dhe Lutfije Meta

Lideri i Lëvizjes Socialiste për Integrim, Ilir Meta zhvilloi dje një takim me minatorët e Bulqizës. Së bashku me drejtues të tjerë të LSI, Meta ishte brenda në galeritë e Minierës së Bulqizës, rreth 800 metra nën tokë dhe bisedoi me minatorët lidhur me problemet me të cilat përballen ata dhe kryesisht për kushtet e punës. Në fjalën e tij, gjatë takimit me minatorët, kreu i LSI tha se kriza ekonomike ka trokitur tashmë në Shqipëri dhe të parët që po e ndiejnë atë janë minatorët, të cilët punojnë për të siguruar bukën e gojës për vete dhe familjet e tyre, në kushte tepër të vështira. Ndërkohë, kreu i LSI-së akuzoi Qeverinë se nuk ka bërë asgjë për Statusin e Minatorit dhe ka lënë minatorët të punojnë në kushte tepër të rënda pune. Kreu i LSI premtoi angazhimin e LSI që minatorët jo vetëm të mos humbasin vendet e punës, por që të investohet sa më shumë në sektorin minerar, në mënyrë që të krijohen qindra vende të reja pune. Gjithashtu, Meta u premtoi minatorëve se LSI do të angazhohet që, pas 28 Qershorit, të diskutojë se bashku me minatorët Statusin e Minatorit dhe ta votojë në Parlament. Gjatë ditës së djeshme, kreu i LSI zhvilloi takime me qindra banorë të Bulqizës dhe Klosit, ku janë prezantuar dhe kandidatët për deputet të LSI në këto zona, Ilir Balla, Agim Hysa dhe Lutfije Meta.