Meta takon Rehn: Zgjedhjet, kusht për integrimin në BE
Aristir Lumezi
Komisioneri i BE-së për Zgjerimin, Olli Rehn priti dje në Bruksel, Kryetarin e LSI, Ilir Meta. Gjatë një takimi që zgjati rreth 45 minuta, kreu i LSI-së i paraqiti Komisionerit Rehn shqetësimet mbi problemet që ka Kodi i ri Zgjedhor, mungesën e garancive për zhvillimin e zgjedhjeve të lira dhe të ndershme në Shqipëri, si dhe monopolizimin që kanë bërë dy partitë e vjetra PD dhe PS, për administrimin e procesit zgjedhor, në kundërshtim me rekomandimet e OSBE-ODIHR, si dhe me dokumentet e rëndësishme ndërkombëtare për zgjedhjet. Nga ana e tij, Rehn i përcaktoi zgjedhjet e ardhshme si kushtin kryesor të integrimit të Shqipërisë në BE. Takimi i kryetarit të LSI-së, Ilir Meta, me komisionarin e Bashkimit Evropian vjen në një kohë kur kjo parti ka nisur aksionin e saj politik për të paralizuar manipulimin e votës në zgjedhjet e ardhshme nga dy partitë kryesore, të cilat miratuan me votat e tyre pak ditë më parë Kodin e ri Zgjedhor. LSI ka nisur kështu një fazë të re në mbrojtje të votës së shqiptarëve, pas grevës së urisë që deputetët e saj ndërmorën për nëntë ditë rresht në sallën e seancave plenare. Ajo do të mobilizojë parlamentarë, përfaqësues të lartë të politikës evropiane dhe botërore, si vëzhgues në zgjedhjet e qershorit 2009, për të paralizuar çdo përpjekje devijimi të votës së partive të tjera nga dy partitë që përgatitën dhe miratuan Kodin e ri Zgjedhor. Ndërkaq, po dje gjatë vizitës së tij në Bruksel, kryetari i LSI-së zhvilloi një takim edhe me Sekretarin e Përgjithshëm të Partisë Socialiste Evropiane, Philip Cordery. Përfaqësuesi më i lartë i socialistëve evropianë Cordery e ftoi kryetarin e LSI-së në Këshillin e PSE-së, që do të mbahet në Madrid në fillim të dhjetorit. Por Philip Cordery ka qenë mjaft i interesuar të informohet rreth zhvillimeve në politikën shqiptare e veçanërisht rreth të majtës shqiptare. Sekretari i Përgjithshëm i PSE, tha gjatë takimit se "jemi të shqetësuar për zgjedhjet e ardhshme në Shqipëri, të cilat duhet të zhvillohen përmes një procesi zgjedhor të lirë dhe të ndershëm, në përputhje me standardet dhe garancitë ndërkombëtare për zgjedhjet".