Miku i Aldo Bares njihet me dënimin në gjykatë
TIRANE - Gjykata e Tiranës e vlerësoi të rregullt arrestimin e Edmond Begos, ish-presidentit të klubit të futbollit të Lushnjës, në bazë të një dënimi me burg nga drejtësia italiane, dhënë në mungesë ndaj tij. I arrestuar rreth një javë më parë, Edmond Bego u paraqit dje para Gjykatës së Tiranës për njohjen me dënimin e dhënë në vendin fqinj. Vendimi i drejtësisë italiane, që e ka dënuar në mungesë Begën me 13 vjet heqje lirie, për akuzën e "trafikut të narkotikëve", është njohur nga Gjykata e Tiranës. Burime pranë seancës bënë të ditur se Bego nuk shfaqi ndonjë pretendim para palëve në gjyq. Ndërsa bëhet e ditur se mbrojtësi i Begës ka kërkuar që klienti i tij të mos mbahet në burgun 313, për shkak të përplasjeve që mund të ketë me të pandehurit e tjerë të "bandës së Lushnjës" që qëndrojnë në këtë institucion. Ish-presidenti i klubit të futbollit të Lushnjës në vitet 2002-2004, që sipas drejtësisë italianë ishte personi që drejtonte një grup kriminal të shpërndarjes së narkotikëve në Itali, u arrestua më 24 dhjetor në Tiranë. Në vitin 2007, Gjykata e Torinos në Itali ka dhënë vendimin duke e dënuar atë në mungesë me burg për veprën penale të "trafikut të narkotikëve". Pas këtij vendimi, i dyshuari i është fshehur drejtësisë duke qëndruar në Tiranë dhe Lushnje, duke përdorur emrat e rremë Manol Bego, Saimir Sina dhe Belul Gjahtari. Sipas drejtësisë së vendit fqinj, ai ishte personi që priste në Itali lëndën narkotike të nisur nga Aldo Bare nga Shqipëria. ar.ba