Mima: Premtojmë se do të ulim tatimin mbi pagën

Kandidatët e PD-së në Qarkun e Tiranës premtojnë lehtësira për biznesin, por edhe për punonjësit në lidhje me taksat. Florion Mima premtoi dje se qeveria në mandatin e dytë do të rrisë pagën minimale dhe do të ulë tatimin për pagën 20 mijë lekë. Kandidatët e Partisë Demokratike në Qarkun e Tiranës, Majlinda Bregu, Florion Mima, Viktor Gumi dhe Indrit Fortuzi, u takuan me punonjës dhe administratorët e fabrikës së këpucëve "Filanto", në rrugën "Don Bosko" në kryeqytet. "Ndërsa punonjëset e fabrikës pohuan se 4 vjet më parë paguheshin rreth 10 mijë lekë të reja në muaj, tani paga e tyre është rritur 80%", tha kandidatja Majlinda Bregu. Kandidatët e PD-së u njohën me kushtet e punës dhe ndryshimet që ka pësuar ky biznes pas uljes së taksave dhe furnizimit pa ndërprerje me energji elektrike. Administratorët e fabrikës theksuan se reforma e taksave dhe klima mbështetëse për biznesin i ka ndihmuar ata për të shtuar linjat e prodhimit dhe për të hapur më shumë vende pune. "Kur erdhëm në pushtet, miliona lekë shkonin për gjeneratorët, ndërkohë që aktualisht në Tiranë ka drita 24 orë", tha Bregu.