Ministria e Financave: Pushteti vendor nuk po e realizon grumbullimin e të ardhurave
Të ardhurat nga pushteti vendor në 7 muajt e parë të vitit rezultojnë me një deficit që është nën nivelin e planifikuar për vitin 2009. Sipas të dhënave zyrtare të Ministrisë së Financave, të ardhurat e mbledhura nga taksat lokale për periudhën janar-korrik arritën në 8 miliardë lekë, nga 10.98 miliardë lekë të planifikuara, duke realizuar vetëm 73.27% të planit të periudhës. Taksa vendore mbi biznesin e vogël ka mbledhur 1.8 miliardë lekë, të njëjtin nivel të ardhurash me një vit më parë; nga tatimet mbi pasurinë (ndërtesa dhe tokë bujqësore) janë mbledhur vetëm 967 milionë lekë, me rënie krahasuar me një vit më parë prej rreth 4 për qind; nga taksat e tjera lokale janë mbledhur për periudhën 5.3 miliardë lekë. Në këtë grup, taksa më e rëndësishme është ajo e ndikimit të infrastrukturës, nga e cila këtë vit janë mbledhur rreth 2 miliardë lekë krahasuar me 920 milionë lekë të të njëjtës periudhë të vitit 2008, me një rritje prej 121 për qind. Rritje kanë pasur dhe të ardhurat nga taksa e reklamave, me 116 për qind dhe nga taksa e tabelës.
Borxhet, Financat vendosin kalimin e 30 milionë eurove të OSSH-së për KESH-in
Korporata Elektroenergjetike Shqiptare do të rikapitalizohet. Me anë të një vendimi të posaçëm, ministri i Financave ka propozuar kalimin e një pjese të fondeve nga privatizimi i OSSH-së, për të mbuluar borxhet e shumta që ka KESH-i. Në llogari të Korporatës do të kalojnë nga paratë e privatizimit të OSSH-së plot 30 milionë euro me të cilat KESH-i do të përmirësojë situatën e vet financiare. “Rreth 30 milionë euro do t’i jepen kompanisë publike ‘KESH’ për të përmirësuar situatën financiare të saj dhe për të shlyer detyrimet që ajo ka ndaj sistemit bankar”,- ka deklaruar disa ditë më parë ministri i Financave, Ridvan Bode. Kalimi i këtyre parave në llogari të KESH-it ka qenë e parashikuar edhe në ligjin e privatizimit të OSSH-së dhe është edhe kusht i garancisë së vendosur nga Banka Botërore. Drejtues të KESH-it kanë thënë në lidhje me këtë proces se, qeveria është e vonuar në kalimin e këtyre fondeve pasi sipas ligjit paratë duhet të ishin dhënë që para një muaji, për të mbuluar gropat financiare që ka Korporata.
25 Gusht 2009