Ministria e Punës po punon intesivisht për të mbajtur nën kontroll situatën e rrugëve automobilistike në të gjithë vendin

Ministria e Punëve Publike dhe Transportit, Drejtoria e Përgjithshme e Rrugëve dhe Drejtorite Rajonale në të gjithë vendin po punojne intensivisht dhe janë në gadishmëri të plotë për të mbajtur në gjëndje pune dhe nën kontroll kalueshmërinë e të gjitha llojeve të mjeteve në akset rrugore kombëtare.

Burime nga kjo ministri bënë të ditur se në bashkëpunim me Drejtorinë e Përgjithshme të Emergjencave Civile në Ministrinë e Brendshme, prefekturat dhe pushtetin lokal, po ndiqet situata shumë të vështirë e krijuar nga moti i keq në disa prej akseve rrugore të vendit. Momentalisht, të gjithë akset nacionale janë nën kontroll, pavarësisht vështirësive të mëdha që po shkakton dëbora e dendur.

Të njëjtat burime vënë në dukje se ne Qarkun e Tiranës rrugët janë të lira dhe pa probleme për qarkullimin e automjeteve. Ndërkohë, në Krrabë, Bërzhite dhe Dajt janë një sërë mjetesh si, borëpastruese, eskavatorë dhe fadroma, të cilat janë gjatë gjithë kohës në punë. Ne Qarkun e Elbasanit rrugët janë të kalueshme. Edhe në Qafë-Thanë nuk ka probleme për momentin, por gjithësesi, janë 3 mjete që po punojnë për kontrollimin e situatës dhe mbajtjen nën kontroll të situatës dhe vazhdon hedhja e kripës për lehtësimin e qarkullimit të mjeteve.

Në Qarkun e Korçës akset janë të gjitha të kalueshme, por rekomandohet përdorimi i zinxhirëve për automjetet. Në Plloçë po punohet me borëpastruese dhe grejder, në segmentin Grabovë – Korcë po punohet me borepastruese, në aksin Korcë-Qafe Qar – Ersekë - Leskovik jane gjithsej 5 borëpastruese, 1 xhipsit dhe 1 fadromë, ne Korcë – Voskopojë dhe Korcë – Dardhë po punohet me borëpastruese dhe traktorë. Gjithashtu, edhe në segmentet Korcë – Dogana Liqenasit, Bilisht- Baban- Hocisht, Plasë-Pojan-Pendnavinj dhe Maliq-Lozhan-Moglicë po punohet me borëpastruese, grejder dhe fadroma për shpërndarjen e kripës dhe skorjeve për të siguruar kalueshmërine e tyre të vazhdueshme.

Në Qarkun e Gjirokastrës nuk ka probleme për qarkullimin e automjeteve. Në segmentet Qafë Muzinë dhe Shkallë e Zezë janë gjithsej 4 fadroma, grejdera, si dhe 1 automjet për hedhjen e kripës dhe skorjeve. Në Qarkun e Shkodrës kalimi i mjeteve bëhet vetëm me zinxhirë. Akset problematike janë Qafë Mali- Qafë Shllak- Fierzë, Pukë – Fushë Arrez, Shkodër – Pukë. Po punohet me borëpastruese, grejder dhe automjete për hedhjen e kripës. Jane duke punuar gjithashtu dhe të gjithë punëtoret e firmave kontraktore për mirëmbajtjen e rrugëve. Është lajmëruar Drejtoria e Policisë së Qarkullimit Rrugor për moslejimin e mjeteve pa zinxhirë. Situata, vecanërisht në zonën e Qafës së Malit, mbetet e vështirë për shkak të stuhisë së fortë të dëborës që ka mbërritur në rreth 70 centimetra trashësi. 

Në Qarkun e Lezhës, në aksin Rrëshen – Rubik – Qafë Bene qarkullimi i mjeteve bëhet vetëm me zinxhirë. Eshtë lajmëruar Drejtoria e Policisë së Qarkullimit Rrugor për moslejimin e mjeteve pa zinxhirë. Në Qarkun e Dibrës aksi Peshkopi – Ura e Cerenecit është i kalueshëm me zinxhirë dhe po punojnë 2 fadroma, 1 borëpastruese dhe 1 varinsk. Në segmentin Qafë e Buall-Ura e Cerenecit po punojnë 3 borëpastruese, 1 varinsk dhe 1 fadrom me zinxhirë si dhe vijon hedhja e kripës dhe e rërës për të mbajtur në gjëndje kalueshmërie rrugën. Situata paraqitet e vështirë edhe në zonën e Maqellarës, për shkak të erërave të forta dhe temperaturave shumë të ulta, që bëjnë që dëbora të shndërrohet menjëherë në akull.

Në Qarkun e Kukësit, aksi Morinë – Kukës, Kukës – Qafë Shllak është i kalueshëm me zinxhirë. Ka 4 mjete borëpastruese në këtë lot. Në aksin Kukës – Morinë po punohet që në orët e para të mëngjesit me 1 borëpastruese dhe 1 eskavator. 3 borëpastruese po punojnë në Kukës – Qafë Shllak. Në Kukës- Shishtavec po punon 1 traktor për të zhbllokuar rrugën. Aksi Kukës- Drajrec- Peshkopi është i hapur deri në Klososjan- Domaj dhe 1 eskavator po punon për ta mbajtur të hapur këtë segment. Në aksin Kukës – Krumë levizet me zinxhirë, ndërkohë është 1 eskavator që po punon. Në aksin e Tropojës po punojnë 2 eskavatorë dhe 2 borëpastruese.

Në qarqet e Durrësit, Vlorës, Fierit dhe Beratit nuk ka probleme me qarkullimin e mjeteve.

Ministria e Punëve Publike, Drejtoria e Përgjithshme e Rrugëve dhe Drejtoritë rajonale do të vazhdojnë të ndjekin në mënyrë të vazhdueshme të gjithë situatën, për të bërë të mundur mbajtjen hapur dhe kalueshëm të të gjithë akseve nacionale.