Miratohet plani italian për Durrësin, KRT-ja jep 64 leje ndërtimi

DURRËS – Më në fund është paraqitur projekti italian për studimin e qendrës historike të Durrësit. Prezantimi i tij është bërë nga ekspertët e Universitetit të Peskaras në mbledhjen e Këshillit të Rregullimit të Territorit në Bashkinë e Durrësit. Ky plan do të mbyllë përfundimisht mundësinë e ndërtimeve të pallateve shumëkatëshe në zonat me vlera arkeologjike. Tashmë qyteti është i klasifikuar në disa zona, ku në zemër të qytetit, ku ka qenë Dyrrahu i dikurshëm, do të ndalohet ndërtimi i objekteve të larta. Më pas, KRRT-ja nisi shqyrtimin e kërkesave për 36 leje për sheshe ndërtimi dhe 20 leje ndërtimi, të cilat janë për ndërtesa nga 3-12 kate, kryesisht në lagjen e plazhit dhe atë të Shkozetit, por edhe në disa nga lagjet e periferisë së afërt të tij, si Lagjet Nr.2, 4, 5, 10, 12 dhe 15. Pjesa më e madhe e godinave do të jenë të pajisura me garazhe nëntokë, ndërsa katet e para do të shfrytëzohen si qendra tregtare dhe biznesi. Nuk kanë munguar kërkesat për ndërtime objektesh të tjera si magazina dhe lokale shërbimesh. Mbledhja vazhdoi ditën e premte dhe të shtunën. Dje u shqyrtuan 8 kërkesa për rifreskim të lejeve për sheshe ndërtimesh. Specialistët e arkeologjisë vazhdimisht kanë dhënë alarmin për bllokimin e ndërtimeve të larta në të ashtuquajturën Zona A, ndërsa autoritetet vendore ndodhen përballë fluksit të madh të kërkesave për ndërtim në të gjithë qytetin.

31 Mars 2008