Misionit EULEX në Kosovë, hetime edhe në Shqipëri. Qeveria: Raporti i Martit, pa asnjë fakt evident

Komisioni i Ligjeve miratoi në parim projektligjin për hetimin e akuzave të bëra nga Dick Marti

Komisioni i Ligjeve ka miratuar dje pr/ligjin për hetimin e EULEX-it në lidhje me akuzat e Dick Martit. Ministri i drejtësisë, Eduard Halimi u shpreh gjatë prezantimit të nismës ligjore se, hetimi duhet të bëhet nëpërmjet një ligji, jo marrëveshjeje, ndërsa theksoi se
përfaqësuesit e EULEX-it kanë zhvilluar takime me ministra dhe prokurorë. Sipas ministrit Halimi qeveria merr përsipër të lejojë hetime në vendin tonë për akuzat e Dick Marty ndërsa ka theksuar se ky ligj kërkon shumicë të cilësuar në Parlament. “Ky është një ligj special, që i drejtohet Task Forcës së EULEX, që do hetojë akuzat. Projektligji është sjellë nga BE dhe në hartimin e tij morën pjesë institucione me rëndësi dhe gjithashtu projektligji është në përputhje me marrëveshjen e Stabilizim-Asociimit”- u shpreh Halimi. Nga ana tjetër deputetët socialistë kanë shprehur parimisht aprovimin e tyre për draftin, por kanë kërkuar kohë për ta studiuar atë, e për të analizuar detajet e projekt/ligjit. Sipas tyre edhe pse ligji është i rëndësishëm nuk duhet të nxitohet për miratimin e tij. Ata kanë theksuar duhet t’u lihet kohë që edhe EURALIUS dhe Prokuroria të japin mendimin e tyre si dhe duhet t’u lihet kohë edhe përfundimit të procedurave të duhura.
Ndërkohë Këshilli i Ministrave miratoi ditë më parë projektligjin “Për marrëdhëniet juridiksionale në çështjet penale me Task Forcën hetimore speciale të EULEX-it”. Kryeministri Berisha vlerësoi se ky ligj do t’i krijojë ekipit të ekspertëve të Task Forcës hetimore të EULEX-it të gjitha mundësitë për një hetim të plotë, në të gjithë territorin e Shqipërisë, të pretendimeve të ngritura në raportin e Dick Marty.
Duke e konsideruar të domosdoshme zbardhjen e të vërtetës mbi këto pretendime, Kryeministri theksoi se raporti nuk bazohet në asnjë fakt evident. Drafti i paraqitur në komision nga ministri i Drejtësisë, Eduard Halimi, i njeh misionit EULEX në Kosovë, autoritetin për të zhvilluar hetime edhe në Shqipëri lidhur me akuzat e përfshira në raportin e relatorit të Këshillit të Europës, Dick Marti, për një trafik të mundshëm organesh të zhvilluar nga UÇK në fund të viteve ‘90, edhe në territorin shqiptar.