"Mjaft!", protestë ndaj përgjimeve

Lëvizja "Mjaft!" protestoi dje para Kryeministrisë kundër projektligjit "Për përgjimet telefonike", ende në fazë diskutimi në komisionet kuvendore. Protestuesit mbanin në duar një parullë ku shkruhej: "Saligrad: Muret kanë veshë dhe veshët mure!". Projektligji në fjalë, përveçse i jep atribute Policisë Gjyqësore, mbi të gjitha i jep kompetenca përgjuese një strukture brenda Ministrisë së Financave, e cila ka të drejtë të përgjojë telefonata me justifikim luftën kundër korrupsionit. Pas miratimit të një lejeje krejt formale nga Prokuroria e Përgjithshme, Ministria e Financave në kundërshtim të plotë me Ligjin Nr. 9157 të vitit 2003 ka të drejtë të përgjojë biseda telefonike. Sipas këtij ndryshimi, kjo ministri përveç se tejkalon kompetencat e saj, operon në kundërshtim me ligjin e përmendur më lart. Kësaj strukture i jepet e drejta të veprojë mbi baza të dyshimit të arsyeshëm dhe jo mbi bazë të modaliteteve të përcaktuara me ligj. Kjo i bën strukturat që operojnë nën ombrellën e kësaj ministrie, një rrezik publik për demokracinë e vendit, jetën private të qytetarëve, si dhe shton paranojën dhe nënshtrimin ndaj sistemit. Lëvizja "Mjaft!" beson se jeta private dhe mosndërhyrja në komunikimet personale, pa prova konkrete, është një e drejtë e pamohueshme e çdo qytetari të një vendi demokratik.