Motet e mia

Gjon NEÇAJ
Motet e mia
( HAIKU )

1.
Vesë agu
mbi luleborë.
Motet e mia.

2.
Nëntë vjet
pa njomur buzët
në këto gurra krojesh.

3.
Nëntë kroje bjeshkësh
gurrashterrur.
Malli për mua i thau.

4.
Jam kjo pranverë e brishtë
plagëmbuluar
nën shtatë lëkura.

5.
Bora përvilet
livadheve të shkretuara.
Egërsirat kërkojnë zgavrat.

6.
Rrugët
kah bjeshkët
më çojnë te larat e borës.

7.
Në sqep dallëndyshesh
fije bari.
Pranverë në sy çikash.

8.
Supet e alpeve të mia
shkundin dimrin.
Blerimi nën krahë fluturash.

9.
I freskuar me ujëbore
mbledh shpatijeve
dredhëza të kuqe.

10.
Piku i ditës.
Mbi rogën ndanë mrizit
pi tamelborë.

11.
Maja të gurta malesh
kapur për dore.
Valle e përjetshme bjeshkësh.

12.
Mëngjes prill.
Këngët e bjeshkëve
në gushë zogu.

13.
Vendlindja ime.
Ndjehem zog
ende pa lindur.

14.
Rudinat kamur
me lulegonxhe.
Stërpikur me lot vese.

22 Qershor 2009