Mungojnë provat, shtyhet gjyqi i Shpëtim Zisës

Prova kryesore e prokurorisë është dëshmia e Zisës që pranon vrasjen e Besim Cengës por gjykata e merr me rezerva

DIBER- Brenda pak ditësh, trupi gjykues i gjykatës Dibër gjen si të "pamjaftueshme" provat për Shpëtim Zisën, të akuzuar për vrasjen makabre të 10- vjeçarit Besim Cenga, i cili banonte në lagjen "Kamen" të Peshkopisë. Edhe në seancën e djeshme gjyqësore nuk është vazhduar me procedurën e gjatë të gjykimit të këtij të akuzuari për vrasjen dhe përdhunimin e fëmijës 10- vjeçar, pasi gjykata nuk i ka vlerësuar të plota provat e sjella nga organi akuzues. Kjo është hera e tretë brenda pak ditësh që seancat në ngarkim të 19- vjeçarit shtyhen nga gjykata. Vetë i arrestuari herë e pranon vrasjen dhe herë jo, duke dhënë simptoma të një njeriu të papërgjegjshëm mendërisht dhe kjo e ka shtyrë trupin gjykues të kërkojë prova të mëtejshme nga ana e prokurorisë.

Madje këtë herë nuk është përcaktuar as data e ardhshme e gjyqit por u la si afat i pacaktuar, çka do të thotë se kjo çështje nuk do të jetë e lehtë për organin e procedimit të cilit i duhet të mbledhë prova më të qenësishme për të akuzuar 19 -vjeçarin Zisa dhe për ta shpallur atë fajtor. Prokurori ka paraqitur si provë në gjykatë rrëfimin e vetë të pandehurit Shpëtim Zisa që e ka pranuar krimin madje duke dhënë dhe detajet e kryerjes së tij, vendin, kohën dhe gjithçka tjetër lidhej me atë ditë. Por nga mënyra sesi Zisa e ka rrëfyer ngjarjen me të qeshur e pa treguar kurrfarë pendese, e ka çuar trupin gjykues të konkludojë se gjithçka ai thotë e bën nën efektin e papërgjegjshmërisë totale mendore, ndaj ka kërkuar fakte të reja që e implikojnë atë në këtë vrasje makabre. Besim Cenga, 10 -vjeçari nga lagjja Kamen e Peshkopisë u vra në 23 tetor të vitit 2007 ndërsa ende nuk është dhënë masa e dënimit ndaj vrasësit të tij, madje ka mundësi që sipas logjikës së ndjekur nga organi gjyqësor, i akuzuari për këtë vrasje që ka tronditur opinionin publik në Dibër dhe jo vetëm, Shpëtim Zisa një ditë dhe mund të lirohet për papërgjegjshmëri mendore.