Nafta “virxhin”, Prokuroria sekuestron 10 kamionë

Tiranë- Hetimi pasuror ndaj të dyshuarve për mashtrim dhe kontrabandë me naftën virxhin, duket se ka nxjerrë “duarbosh” Prokurorinë. Nga përgjigja e institucioneve që merren me administrimin e pasurive, apo edhe bankat, dy të pandehurit kryesorë për mashtrimin me virxhinin rezultojnë të “varfër” dhe me shuma të papërfillshme në llogaritë e tyre bankare. Të vetmet prona që ka mundur të sekuestrojë prokuroria, në kuadër të hetimeve për pastrim të produkteve të veprës penale janë 10 kamionë e bote, që rezultojnë në emër të kompanisë “Euroil”, në pronësi të biznesmenit Hajri Elezaj, i cili ndodhet në qeli si organizator i skemës së mashtrimit. Menjëherë pas përgjigjes së Drejtorisë së Transportit Rrugor, që konfirmonte pronësinë e 10 kamionëve apo mjeteve të tjera të tonazhit të rëndë, organi i akuzës ka urdhëruar sekuestrimin e tyre deri në përfundimin e hetimeve për këtë çështje. Sipas burimeve të rezervuara, mësohet se kjo është pasuria e vetme që prokuroria ka mundur të sekuestrojë, të paktën deri në këtë fazë të hetimit, edhe pse dëmi i shkaktuar nga skema e mashtrimit me naftën virxhin ka një vlerë disa herë më të lartë. Gjithashtu, organi i akuzës ka kryer verifikime edhe për bizneset e tjera që disponojnë të arrestuarit, por pjesa më e madhe e tyre rezultojnë të jenë krijuar para se të niste i ashtuquajturi eksport i naftës virxhin, e cila sipas prokurorisë është përzier me benzinën dhe më pas është rihedhur në tregun e karburanteve. Për këtë çështje, prokuroria ka administruar dëshmitë e të paktën 80 personave që kanë dijeni apo informacione për lëvizjen e naftës virxhin, e cila pavarësisht se deklarohej për eksport ka qarkulluar brenda vendit në formën e karburantit. Dëshmi për këtë çështje kanë dhënë edhe shoferët e kompanisë “Fisheku” në pronësi të biznesmenit Iljas Fisheku, të cilët u liruan nga Gjykata e Tiranës pak javë më parë. Në deklarimet e tyre, punonjësit e kompanisë kanë pohuar se nafta virxhin që ata kanë transportuar nuk ka shkuar në Vlorë, ashtu siç është deklaruar, por në Durrës. Këto deklarime përputhen edhe me të dhënat e siguruara nga hetimet, të cilat hedhin dyshime të forta se nafta virxhin është përzierë me benzinën, në depozitat që biznesmeni Hajri Elezaj kishte marrë me qira në Durrës.