Nano takim me kreret e Bosnjë Herxegovinës

20/04/2005  Kryeministri Fatos Nano dhe Kryetari i Dhomës së Deputetëve të Bosnje-Hercegovinës, Sadik Xhaferoviç, gjatë takimit të zhvilluar dje, në selinë e qeverisë, kanë shprehur gatishmërinë për bashkëpunim në fushën e transportit, duke shqyrtuar mundësitë për vendosjen e lidhjes ajrore Tiranë-Sarajevë dhe të linjës detare Durrës-Plloçë. Gjatë bisedimeve, dy autoritetet kanë shqyrtuar mundësinë e krijimit të një tregu të përbashkët në fushën e energjetikës, duke e cilësuar si një hap përpara në proceset e zhvillimit rajonal dhe të integrimit evropian të vendeve. Gjithashtu, bashkëbiseduesit kanë shprehur vullnetin e përbashkët për nxitjen e hapave në drejtim të liberalizimit të lëvizjes së lirë për kategori të caktuara shtetasish të të dy vendeve, si biznesmenë, turistë, njerëz të kulturës, artit etj. Xhaferoviç i ka shprehur Kryeministrit Nano përshëndetjet miqësore të Kryeministrit të Bosnjë-Hercegovinës, Adnan Terziç, duke i bërë të njohur se së shpejti ai do të zhvillojë një vizitë në Shqipëri, së bashku me një grup të sipërmarrjes private, për të nxitur bashkëpunimin konkret në këtë funksion.