Ndërmarrjet e privatizuara, shtyhet afati për blerjen e truallit

 

Shtyhet afati për blerjen e truallit në ndërmarrjet e privatizuara. Sipas projektvendimit të miratuar dje nga qeveria, të gjitha subjektet të cilat kanë privatizuar objekte apo ndërmarrje, por që nuk kanë privatizuar sipërfaqen e truallit, sipas gentplanit që i bashkëngjitet dokumentacionit të privatizimit duhet të blejnë këtë truall deri më 30 qershor të 2010-ës. Pra në sajë të këtij projektvendimi, qeveria ka shtyrë afatin për kryerjen e procedurave ligjore të shitjes së trojeve të objekteve apo ndërmarrjeve të privatizuara në vite nga ish AKP-ja. Sipas vendimit të mëparshëm të qeverisë, afati i blerjes së truallit për subjektet që kanë privatizuar objekte apo ndërmarrje deri më 31 maj të vitit 2008 pati efektet e veta, pasi gjatë periudhës shkurt-maj të 2008-ës pati një rritje të numrit të kërkesave nga subjektet përkatëse. Gjatë kësaj periudhe janë arkëtuar 13.767.598 lekë për 4960 metër katror, pa përfshirë këtu vlerën e qirasë të arkëtuar pranë organeve të pushtetit vendor, ku siç dihet nuk janë paguar që nga momenti i privatizimit të këtyre objekteve apo ndërmarrjeve, si dhe janë në proces rreth 200 kërkesa për blerje trualli. Për këtë arsye qeveria vendosi që të shtyjë afatin.