Ndoka në Shkodër: “PD-PS po shkelin standardet minimale për zgjedhjet”

Kryetari i PDK-së, Nard Ndoka, gjatë një takimi të zhvilluar në qytetin e Shkodrës, ka akuzuar dy partitë e mëdha se po shkelin standardet e zgjedhjeve duke përdorur administratën shtetërore të mbushë sheshet gjatë mitingjeve që ata zhvillojnë. “PD-PS po shkelin standardet më minimale për zgjedhje të lira dhe të ndershme”, - është shprehur Ndoka. Sipas tij, më 28 qershor zgjedhësit duhet t’u japin fund praktikave të abuzimit të tejskajshëm të pushtetit jo vetëm për pasurimin e drejtuesve të pushtetit dhe të rrethit familjar, por edhe të deformimit të zgjedhjeve. “Ne nuk mund të lejojmë që demokracia jonë e brishtë të merret peng nga dy njerëz, që gjithçka e quajnë të tyren, Shqipërinë, qeverinë, partinë, prokurorinë, gjykatën, bregdetin, zonat turistike, rrugët, lumenjtë, liqenet, pronën dhe liritë e qytetarëve”, - tha Ndoka. Sipas tij, PS-ja dhe PD-ja kanë përfshirë shtetin, administratën publike qendrore dhe lokale dhe të gjithë logjistikën e mundshme shtetërore në fushatë, në kundërshtim me ligjin. “Papërgjegjshmëria dhe babëzia e tyre arrin deri dhe në përdorimin e fëmijëve të shkollave, të cilët po keqpërdoren nëpër mitingje”, - është shprehur Ndoka. Ai nënvizoi si shqetësuese faktin që shumë kandidatë në kundërshtim me ligjin vazhdojnë garën pa dhënë dorëheqje nga postet publike dhe shtetërore që mbajnë.

13 Qershor 2009