Ndoka prezanton Marie Dobrën, kandidate në njësinë Nr .4

PDK është e vendosur për rimëkëmbjen sociale të qytetarëve shqiptarë. Theksin në këtë drejtim kryetari Demokristian Ndoka e ka vënë edhe gjatë prezantimit të kryetares së Forumit të Gruas, e cila është dhe kandidate e njësisë Nr. 4, Marie Dobra. Gjatë fjalës së tij, Ndoka u tha të pranishmeve se emrat dhe kandidaturat, që PDK ka prezantuar për qarkun e Tiranës, janë artificiale, dhe numra rendor, vetëm se i kërkon ligji, por një zë i fuqishëm në qeverisjen e nesërme. Tirana më shumë se çdo qytet tjetër në vend është kthyer në qendrën e pabarazisë sociale ku dallojnë qartazi politikat e mbrapshta të qeverisë dhe të bashkisë. Ne nuk vijmë para jush duke sharë. Ne vijmë para jush duke drejtuar gishtin mbi ata të cilët janë përgjegjësit e kësaj masakre sociale në kryeqytet, që janë PD dhe PS . Ne ofrojmë për ju zgjidhje konkrete me një paketë qeverisëse plotësisht të realizueshme dhe mjaft sociale, u shpreh Ndoka. Në dallim nga forcat e tjera politike në vend PDK, ka ofruar për zgjedhësit një pakte konkrete, e cila do të mundësojë përmirësimin e jetesës sociale të qytetarëve duke vënë në plan të parë çiftet e reja, arsimin, kujdesin ndaj studentëve, si dhe përmirësimin konkret të strehimit. Më tej gjatë fjalës së tij, Ndoka informoi të pranishmit se pika e parë e vendimeve të PDK-së, në parlament dhe në qeverisje do të jetë vendimi që 30% e banesave sociale, që do të ndërtohen tu jepen çifteve të reja me një fëmijë, në mënyrë që ato të kenë shansin të nisin një jetë normale.