Ndotja e ajrit, ISHP: Tirana si Nju-Delhi

Qendra e Tiranës renditet si një nga kryeqytetet më të ndotura të Europës, ndërkohë që më keq për cilësinë e ajrit, pas saj, është Pekini dhe Nju-Delhi. Të dhënat më të fundit që raporton Instituti i Shëndetit Publik (ISHP) vazhdojnë ta rendisin Tiranën si kryeqytetin më të ndotur në Europë, por dhe Shqipërinë ndër vendet më të ndotura, përkrah Pekinit dhe Nju-Dehlit. Sipas specialistëve të ISHP-së, qendra e Tiranës është zona me ndotjen më të lartë, kjo si pasoje e grimcave të pluhurit të cilat janë mbi normat e lejuara të Bashkimit Europian. “Ka një shkallë që përdoret në studimet e cilësisë së ajrit të lidhura me shëndetin e popullatës apo rrezikshmërinë ndaj popullatës. Kjo shkallë ka 10 njësi. Kur është mbi 10 është shumë keq. Shifra 9.4 rikonfirmon që qendra e Tiranës hyn në një nga kryeqytetet e Europës, të mos them më i ndoturi. Më keq se Tirana për cilësinë e ajrit është Pekini dhe Nju-Delhi”, - thotë Agron Deliu, specialist në ISHP për ndotjen. Në këto kushte, specialistët shprehen se ndërhyrja për ndryshimin e situatës është tepër emergjente. Sipas tyre, një nga rrugët që do t’i jepte zgjidhje të shpejtë është shtimi i hapësirave të gjelbra. Nëse në vitet ‘90 për çdo banor kishte 10 metra katrorë gjelbërim, tashmë ka arritur 3 metra katrorë për banor. “Hapësirat e gjelbra janë një nga masat që ndihmojnë përthithjen e kësaj ndotjeje”, - pohon Deliu. Ndërkaq, specialistët e Shëndetit Publik u bëjnë thirrje të gjitha strukturave, si atyre të pushtetit lokal, por edhe qendror, që të ndërhyjnë, pasi kjo ndotje do të sjellë një sëmundshmëri të madhe në popullatë.