Ndryshimet ne qeveri, rrezikojne Ndoka, Bode, Pollo dhe Olldashi
Eljona Ballhysa
Ndryshimet në kabinetin qeveritarë, duket se do të jenë thelbësore dhe jo të pjesshme. Burime nga grupi parlamentar i Partisë Demokratike bëjnë të ditur se kryeministri Berisha ka nisur konsultimet, jo vetëm me aleatët, por dhe me eksponentë të rëndësishëm të PD-së, për të realizuar riformatimin e radhës së kabinetit qeveritar. Sipas burimeve, ndryshimet do të kenë si synim ruatjen e formulës së përfaqësimit të aleatëve, por dhe dhënien e një imazhi të ri të qeverisë. Kabineti qeveritar pritet të ndryshojë drejtues në të paktën katër portofole prioritare. Sipas burimeve, përveç zëvendësimit të postit bosh të zëvendëskryeministrit, në sitën e shqyrtimeve është ministria e Shëndetësisë, ajo e Arsimit dhe ministria e Transporteve.
Deklaratat
Edhe në radhët e demokratëve kërkesat për ndryshime në qeveri shtohen dita-ditës. Ish-ministri i Jashtëm, Besnik Mustafaj, së fundmi, ka dalë me një emër konkret për largimin nga qeveria. Sipas Mustafajt, është e nevojshme që ministri i Financave, Ridvan Bode, të largohet nga qeveria. Ai thekson se kabineti qeveritar kërkon një riformatim thelbësor, pasi rrezikon zgjedhjet e vitit 2009. “Qeveria rrezikon zgjedhjet e ardhshme. Në sajë të disa ligjeve të hartuara nga ministri i financave ne kemi nofkën qeveria e gjobave. Janë ligje që janë hartuar keq, që na kanë dhënë një nofkë të tillë. Për mua përgjegjës kryesor është ministri i Financave dhe kryeministri që e ndjek ministrin e Financave me arrogancën që ai sillet ndaj biznesit”, është shprehur Mustafaj. Një kërkesë e tillë është bërë kohë më parë edhe nga politikani Sabri Godo. Ai ka vënë theksin në nivelin e ulët të jetesës dhe në rritjen e cmimeve nga dita në ditë, duke bërë përgjegjëse për këtë politikën e keqe ekonomike që ka ndjekur qeveria. Nga ana tjetër demokratët kërkojnë më tepër përfaqësim në postet prioritare, siç është ministria e arsimit, e cila menaxhon një gamë të gjerë vendesh punësimi. Kjo do t’i jepte mundësinë demokratëve që të afronte në vitin e fundit të qeverisjes militantët, të cilët janë të rëndësishëm në kohë zgjedhjesh. Megjithatë, pritet kryeministri Berisha që të vendosë firmën e fundit në kabinetin e ardhshëm, që sipas gjasave do të drejtohet prej tij.
Ndryshimet
Ndërkaq, ministri i Shëndetësisë, Nard Ndoka, i pyetur nga gazeta “Albania” për një largim të mundshëm të tij nga ky post, shprehet se deri tani nuk ka asnjë njoftim zyrtar. Madje, Ndoka shprehet i habitur edhe për qarkullimin e një informacioni të tillë.
Megjithatë, burimet bëjnë të ditur se konflikti i brendshëm në partinë e Ndokës ka sjellë një ftohje të marrdhënieve të tij me kryeministrin Berisha. Fakti se Ndoka ka kërkuar shkarkimin e dy zëvendësministrave, Gurakuqi dhe Bushati, të cilit kanë qenë anëtarë të PDK-së dhe mosshkarkimi i tyre nga kryeministri, tregon qartë dhe marrdhëniet e ndera mes tyre. Mendohet se kreu i qeverisë do t’i ofrojë postin e zëvendëskryeministrit PDK-së, i cili është një post thuajse honorifik. Por PDK-ja rrezikon të mbetet edhe jashtë qeverisë. Nga ana tjetër, republikanët kanë shtuar kërkesat ndaj kreut të qeverisë. Gjatë ditës së djeshme këta të fundit kanë mbledhur kryesinë e partisë ku kanë diskutuar rreth pjesëmarrjes së tyre në kabinetin qeveritar. Burimet nga kjo mbledhje kanë bërë të ditur se do i dërgojnë kryeministrit një kërkesë për përfaqësimin e PR-së në një nga tre postet qeveritare, në ministrinë e Shëndetësisë, në ministrinë e Arsimit dhe në ministrinë e Bujqësisë. Sipas burimeve, pritet të jetë kryeministri ai që do të vendosë se cilin nga këta tre poste do t’i ofrojë PR-së.
22 Korrik 2008