Në Korçë me "Kohë për t‘u çmendur"

"Kohë për t‘u çmendur". Nën këtë titull ka zbritur në Korçë jo vetëm një komedi brilante, por edhe më tej se kaq një inskenim i veshur me petk aktorësh gjigantë, jo nga përmasat trupore, por nga interpretimi dhe madhështia e tyre si aktorë të skenës. Roland Trebicka përkrah Rajmonda Bulkut, i është bashkuar aktorëve korçarë në një komedi që ka përhapur jo vetëm humorin, por edhe ka rikthyer mes publikut korçar në këtë sezon emra të përmasave kombëtare. Trupa e aktorëve mes të cilëve është rikthyer në skenën e teatrit "Çajupi" edhe aktori Roland Trebicka, kanë interpretuar përmes humorit fatin e një individi në kohën e një shoqërie në tranzicion. Pikënisja mund të ishte një dramë. Megjithatë, vepra e vënë në skenën e teatrit të Korçës ka qenë një komedi, me ngjarje që i përkasin kohës së sotme. Ajo është përcjellë përmes humorit për publikun korçar. Jo pa qëllim ka qenë kjo zgjedhje e regjisorit Gëzim Kame, në veprën e cila është bazuar në skenarin e Kiço Blushit. Nëpërmjet humorit, regjisori Kame ka sjellë pjesët e një realiteti, i cili mund të shikohet edhe ndryshe, jo për nga dramaticiteti, por nga optimizmi dhe ngjyrosja me nota gazmore. Aktorët e Teatrit Kombëtar, Trebicka dhe Bulku, kanë interpretuar me trupën e Korçës. Në qendër të komedisë, personazhi kryesor interpretuar nga Roland Trebicka me batutat dhe humorin e zgjedhur, ka përcjellë individin mes një shoqërie që duket se ka humbur vlerat morale dhe njerëzore në kushtet e tranzicionit. Fati i keq përbuzet dhe me të tallet edhe vetë personazhi, por njëkohësisht ai pranon që jeton në rrjedhën e një çmendurie të vetë kohës dhe si pasojë është pjesë e kësaj çmendurie. Nuk flitet për moral dhe as për norma njerëzore, që e bën personazhin të kuptojë se shoqëria nuk ka nevojë për njerëz të ndershëm e për virtyt. Por përmes kësaj loje dhe jetese në tranzicion ai rebelohet edhe vetë shoqërisë së pamoralshme. Për autorin e kësaj komedie edhe vetë realiteti është si një skenë plot me dramatizëm, por dhe aq komik njëkohësisht, ndërsa për publikun ta shohësh këtë realitet në një pjesë skene është e magjishme.