"Në fillim të mandatit të dytë, shqiptarët do të lëvizin pa viza"

Ministri i Punëve të Jashtme, Lulzim Basha

Tiranë (23 maj), - Ministri i Punëve të Jashtme, Lulzim Basha, deklaroi dje se “në mandatin tonë të dytë shqiptarët do të lëvizin pa viza si evropianë, të barabartë mes evropianëve”.
Këtë deklaratë ministri Basha e bëri gjatë fjalës së tij përshëndetëse mbajtur në Kongresin Elektoral të PD-së. Ministri Basha kujtoi se “vetëm me vullnetin e hekurt të kësaj qeverie ia dolëm të rrëzojmë muret e izolimit që ishin krijuar nga krimi, korrupsioni dhe keq-qeverisja socialiste”.
Ministri Basha kujtoi se ishin reformat e suksesshme të qeverisjes së djathtë që bënë të mundur arritjet e mëdha që Shqipëria ka pësuar përgjatë këtyre 4 viteve.
“Shqipëria nisi rrugën e saj drejt NATO-s dhe BE-së. Njëri pas tjetrit udhëheqësit euroatlantikë konfirmuan mbështetjen për qeverinë Berisha dhe reformat që kanë ndryshuar vendin. Krah për krah me Kryeministrin Berisha, Presidenti i SHBA-së, George W. Bush, përcolli nga Tirana dy mesazhe historike: Kosova e pavarur dhe Shqipëria në NATO”, tha ministri Basha. Shefi i Diplomacisë shqiptare tha se “Së bashku, ne i dhamë fund padrejtësisë historike, pasi Kosova e pavarur, demokratike dhe euroatlantike, është sot shteti më i ri i Evropës”.
Duke folur për realitete që shqiptarët tashme i kanë prekur, Ministri i Punëve të Jashtme tha se “për Shqipërinë u bë realitet ëndrra e anëtarësimit në NATO”.
Duke kujtuar punën që është bërë nga qeveria deri në arritjen e këtij momenti historik, Basha tha se “Kryeministri Berisha nënshkroi MSA-në dhe hapi kapitullin e ratifikimit të saj në një kohë rekord nga 27 vendet anëtare të BE-së, që votëbesuan qeverinë shqiptare dhe reformat e saj”.
Duke kujtuar suksesin më të fundit të qeverisë, dorëzimin e kërkesën për anëtarësim të plotë në BE, Ministri Basha tha se “procesi i liberalizimit të vizave është në rrugë të mbarë dhe në fillim të mandatit tonë të dytë ne do të lëvizim pa viza, si evropianë të barabartë mes evropianëve”.