Nelsinjo Pike: Briatore, injorant për gjithçka në F.1

"Flavio Briatore është injorant, ai nuk kupton asgjë që ka lidhje me Formula 1". Këto janë fjalët e Nelsinjo Pike, që vazhdon sulmet kundër menaxherit të Renaultit, i cili e përjashtoi nga skuadra për shkak të rezultateve të dobëta në Botërorin 2009. Për "Autosport", Pike nuk i kurseu akuzat për Briatoren: "Ai nuk di të drejtojë një skuadër e F.1. Kur garoja te Reno nuk më kushtonte aspak vëmendje dhe nuk arrinte ta kuptonte se çfarë i nevojitej skuadrës". Nuk munguan as krahasimet, për të mbështetur pretendimet e pilotit: "Ishte njësoj sikur të bisedoje me motrën time për makinat dhe nuk e kishte idenë se ç‘po ndodhte në garë". 24-vjeçari shtoi: "Të gjithë e njohin egon e tij dhe faktin se Briatores i pëlqen të sillet si mendjemadh. Kjo mund të jetë një mënyrë efikase për të bërë biznes, por mendoj se Renoja mund të funksionojë më së miri edhe pa të".