Nëna dhe djali vrasin me thikë babanë

FIER/ Ylli Zeqaj është qëlluar me thikë ndërsa ishte në banesën e tij. Policia prangosi Luljeta Zeqajn dhe të birin

FIER - Vret ish-bashkëshortin me thikë me ndihmën edhe të djalit të saj vetëm 16-vjeçar, teksa përfundon në pranga. Ylli Zeqaj, banor i lagjes "Apolonia" në qytetin e Fierit është gjetur në banesën e tij, teksa në trup kishte plagë thike.

Ngjarja mësohet të ketë ndodhur ditën e premte, ndërkohë që trupi është gjetur mëngjesin e së dielës. Policia ka shoqëruar ish-bashkëshorten e viktimës, dy djemtë e tij, si dhe persona të tjerë, të cilët janë marrë në pyetje për të zbuluar më tepër lidhur me ngjarjen, ndërkohë që vetëm në orët e vona të mbrëmjes së kaluar deklaroi emrat e autorëve.

Ngjarja

Ylli Zeqaj banonte në lagjen "Apolonia", në katin e parë të një pallati. Mësohet se ai kishte nxjerrë për shitje apartamentin ndërsa prej një viti ishte ndarë nga bashkëshortja e tij me të cilën kishte dy djem. Mëngjesin e së dielës djali i tij i vogël, rreth orës 10:30 të mëngjesit të së dielës ka shkuar në shtëpi e më pas është drejtuar për tek shtëpia e gjyshes së vet, së cilës i ka treguar se ka gjetur të atin të zhytur në një pellg gjaku. Më pas ata janë rikthyer në banesë.

Ka qenë pikërisht nëna e viktimës ajo që ka njoftuar më tej të afërmit, si dhe policinë lidhur me vdekjen e të birit. Mbërritja e mjekut ligjor në banesën ku ndodhej trupi i 48-vjeçarit ka bërë që të zbulohej se vdekja ishte shkaktuar si rrjedhojë e një plage të thellë thike në trupin e Zeqajt.

Hetimet

Burime nga policia bëjnë të ditur se viktima kishte pasur gjatë gjithë kohës grindje me ish-gruan e tij. Shkak për këtë ishte fakti që ai kishte nxjerrë njoftim për të shitur shtëpinë, gjë për të cilën ish-bashkëshortja nuk ishte dakord. Kjo e fundit pas ndarjes banonte në lagjen "1 Maji" të Fierit ndërsa dy djemtë rrinin me babanë e tyre, i cili punonte me mëditje te persona të tjerë.

E marrë në pyetje ish-bashkëshortja është shprehur se ajo kishte komunikuar në telefon me të pasi kishte mësuar se Zeqaj po bënte punime duke ndarë me mur njërën dhomë. Mësohet se ajo i ka kërkuar që të mos bënte asnjë punim pa dijeninë e saj. Dje në mëngjes ai është gjetur i vdekur me një shenjë të thellë plage në trup.

Në orët e vona të pasdites nga ana e bluve u bë e ditur se nga autopsia kishte rezultuar se 48-vjeçari ishte vrarë me thikë dhe se vrasja dyshohet të ketë ndodhur ditën e premte. Në pyetje u morën dy djemtë e viktimës, ish-bashkëshortja, si dhe të njohur të 48-vjeçarit. Në orët e vona të së dielës, u vendos arrestimi i gruas 45-vjeçare Luljeta Zeqaj dhe i djalit të vogël të viktimës, vetëm 16 vjeç.

Sipas policisë, pas një sherri të ndodhur në banesë, në bashkëpunim me njëri-tjetrin ata kanë vrarë me thikë kryefamiljarin. Krimi brenda familjes është kthyer në një plagë për shoqërinë shqiptare. Të shtunën një burrë në Shkodër vrau bashkëshorten dhe vajzën.