Nënë Jovanka, e shqetësuar për mocionin me debat kundër kryeministrit

Antena brenda familjes

I dashur Damir

Lajmet e fundit që po më vijnë nga Shqipëria, po më mërzisin si tepër. Por sa më të hidhura janë lajmet, aq më shumë po më shtohet respekti për miqtë e tu dhe vendosmërinë e tyre për të të mbrojtur deri në fund.

Kam marrë vesh se nesër do të ketë debat në Kuvend me kryeministrin për punën tënde. As në ëndërr s’do na kish shkuar që do vinte një ditë, që kryeministri i Shqipërisë të bëhej hero për të mbrojtur një djalë të thjeshtë serbo-boshnjak. Kjo do të thotë se s’i kemi njohur mirë shqiptarët dhe i kemi paragjykuar.

E kam parë me vëmendje përse duan ta akuzojnë. Thuaj shyqyr që po merren me shitje-blerjet e tua me toka dhe firma me vajzën e tij e s’po merren me tenderat e energjisë.

Ai ka treguar karakter që më 2005. Më kujtohet atëherë sa erdhi në pushtet dhe Shqipëria mbeti pa drita. Ti ia gjete energjinë nga ai miku yt serb, por ai mori lekët dhe s’mundi ta binte dot, se s’kishte linja. Do ishte bërë skandal i madh atëherë, por shyqyr që s’kishte opozitë dhe s’e mori vesh njeri. Po dhe ai guxim të madh mori që e mbrojti në mbledhje qeverie dhe e quajti të arsyetuar mos-sjelljen e energjisë. Ajo punë të dha shumë krah që u more me energji. Pastaj puna eci vetë. E kam parë që duan t’i bien në qafë dhe Lazareviçit. Po me atë ç’kanë? Ai i ka fituar vetë të gjitha. Ti thjesht ke marrë pjesë në tender dhe ke njoftuar fitoren e tij. Dhe atë mikun tënd nuk e kapin dot. Ai këtij drejtorit të ri të KESH, siç më ke thënë ti, vetëm një herë i ka thënë në telefon një porosi: “Gjergji, prite pak këtë Damirin, se ka ca energji për të shitur”. Pas kësaj ti i ke fituar vetë të gjitha garat në emër të Lazareviçit. Po dhe ti ke pak faj, se e ke tepruar me atë intervistën tek ai televizioni “Klan”, që ke thënë se je pronar i kompanisë së Qipros. Kaq u desh që ata të ta gjenin se je pronar dhe i kompanisë në Zagreb dhe kjo do t’i hapë telashe atij mikut tënd. Se ai është nxituar dhe ka thënë që ti s’ke marrë asnjë euro nga fondet publike.

Nejse, shpresoj që ai ta hedhë lumin. T’i fusë një të kërcënuar atyre, t’u thotë që kam dosjet tuaja, dosjet e krimit, dosjet e mafies, por mos ta teprojë që ia ke dhënë ti, se s’e beson më njeri këtë punë. Se në Shqipëri e kanë akoma inat UDB, me sa shoh, s’u ka ikur inati me të. Dhe duket sikur të ka dhënë ndonjë gjë ai kushëriri im. Ku ta dinë ata të shkretët që ai as ka denjuar të të presë në takim ty.

Së fundmi kam parë dhe guximin me të cilin disa ministra mbrojnë ato që kanë bërë për shitjen e armëve dhe atë punishten afër Tiranës që shpërtheu. Më kujtohet që më flisje shpesh për të. Më the si ua tregove modelin dhe çfarë të bënin. Më kujtohet që u dukej çudi se si mund të bëheshin pará me atë punë, se s’kishin përvojë. Po ja, ti ua mësove dhe ata ecën vetë. Tani jam shumë e çuditur se si nuk e kuptojnë se ajo është punë e pastër dhe s’do merrej vesh sikur mos të shpërthente ajo dreq depo. Se e kanë këtë të metë shqiptarët, nuk janë shumë të kujdesshëm. Bravo i qoftë atij ministrit të Drejtësisë që e merr përsipër vetë gjithë këtë betejë. Dhe Aldo Bumçi mirë veproi. Duan t’i mbyllin gojën për një faks që i ka dërguar Shkëlzenit, mikut tënd. Po ai po nuk ndihmoi djalin e kryeministrit, kë do të ndihmojë? Ti s’je djali i tij dhe të është bërë baba e shkuar babait. Mos të flas për Lulëzimin. M’u bë zemra mal që i kërkoi ndjesë kunatit që i ka hapur telashe. Kështu duhet vepruar. Dhe ai miku yt, kryeministri, duhet t’i kërkojë ndjesë baxhanakut që e mori më qafë dhe e vrau për pesë lekë aty bashkë me të tjerët. Kjo është shumë korrekte. Falje duhet kërkuar për çdo gjë, jo vetëm për aksidentet.

Po që të mos ta humbasim fillin e atij debatit që do bëhet nesër. Çoji një mesazh atij mikut tënd. I thuaj të mos tërhiqet nga kjo punë, se do inkurajohen kundërshtarët. T’i hedhë të gjithë në betejë. Kush i shmanget betejës, ta heqë nga listat e deputetëve. Më mirë për ty që u nda puna, pro ose kundër teje atje. Ata që duhet të qëndrojnë në politikë nga partia e mikut tënd, duhet të jenë të qartë, o me ty e deputetë, o kundër teje e në rrugë. Nuk ka zgjidhje të mesme në këtë rast. Duhet ta kuptojnë qartë këtë. Ai është burrë i zgjuar dhe e di vetë, por sidoqoftë çoja këtë mesazh. Dhe t’i fusë dhe një të sharë atij gazetarit që merret me ty në gazetën “TemA”. Tender- gazetar s’ka lezet t’i thotë, se mërziten ata dy miqtë e tu gazetarë që fitojnë tendera, po t’i thotë ndonjë gjë tjetër, ta shpikë. E di vetë ai se ç’bën, se s’ia kam merakun për këto gjëra. Vetëm dorëheqje të mos japë, se aq duan ata, e vënë para pastaj. Dhe ti i ke punët hapur dhe do të hapin telashe. Të rezistojë pak, sa të rregullosh letrat të paktën.

Me zemër të ngrirë deri nesër.

Me dashuri, nënë Jovanka