Nis në Pezë procesi i rithemelimit të së majtës shqiptare Nga TemaEdi Rama nis nga Peza rrugën e bashkimit të të majtëve shqiptarë në një konfederatë. Në 67-vjetorin e Konferencës së Pezës, që bashkoi komunistët dhe nacionalistët në një front të përb

Nëse dëshironi të lexoni edicionin online të gazetës në PDF klikoni këtu.

Edi Rama nis nga Peza rrugën e bashkimit të të majtëve shqiptarë në një konfederatë. Në 67-vjetorin e Konferencës së Pezës, që bashkoi komunistët dhe nacionalistët në një front të përbashkët antifashist, gjatë Luftës së Dytë Botërore, përkrah kryetarit të PS u shfaqën në shtëpinë e Myslym Pezës përfaqësuesit e LSI, Xhufi, Klosi, Legisi dhe Muçi, të cilët janë shprehur kundër vendimit të forumeve të LSI për të qenë pjesë e qeverisë Berisha. Në krah të Ramës ishin dje në Pezë edhe krerët e PSD, Skënder Gjinushi dhe ai i PDS, Paskal Milo. Në takimin e kryer në shtëpinë e Myslym Pezës në Pezë, krerët e partive të majta shqiptare kanë diskutuar për rrugën që do të ndiqet për riformatimin e së majtës duke risjellë në vëmendjen e publikut idenë e një konfederate, e cila është propozuar kohë më parë nga kryetari i PSD, Skënder Gjinushi. Edi Rama dhe bashkëpunëtorët e tij do ta quajnë rithemelim të së majtës, atë proces që pritet që së shpejti të bëhet publik, konfederata e së majtës shqiptare. Në këtë aleancë të re pritet të përfshihen aleatët e PS, PSD, PDS, si dhe partia e drejtuar nga Erion Veliaj, G99.

Përpjekjet e Ramës për bashkimin e së majtës nuk po shkojnë paralelisht me përpjekjet për bashkimin e PS. Një grup deputetësh të PS, anëtarë kryesie dhe figura të rëndësishme të kësaj partie që në themelimin e saj, janë pozicionuar kundër Edi Ramës, duke i kërkuar atij të ndalojë politikën e bojkotit dhe të pranojë se ka humbur zgjedhjet për shkak të paaftësisë të tij në drejtimin e PS. Ben Blushi, Arben Malaj, Kastriot Islami, Andis Harasani, Marko Bello, Musa Ulqini, të mbështetur nga figura të rëndësishme të PS si ish-presidenti, Rexhep Meidani apo themeluesi i PS, Moikom Zeqo, kanë nisur prej disa ditësh një lëvizje për reformimin e PS. Ata pretendojnë gjithashtu të bashkojnë Partinë Socialiste dhe të majtën në përgjithësi. Të emërtuar si Lëvizja për Mendimin Ndryshe në PS, grupi i kundërshtarëve të Ramës në PS pritet të nisë së shpejti një tur takimesh në bazën e partisë për të publikuar atje synimet e tyre për reformimin dhe bashkimin e PS, të së majtës shqiptare, për ta finalizuar me ardhjen në pushtet të PS. Por të njëjtat synime u shfaqën dje në Pezë nga Rama dhe bashkëpunëtorët e tij në PS, bashkë me faktorët e tjerë të së majtës shqiptare. Kjo situatë duket se flet shumë më tepër për përçarjen e së majtës dhe vazhdimin e këtij procesi se sa për të kundërtën, bashkimin e PS dhe të majtës shqiptare