Nishani: Legjislacioni ynë, garanci për investimet e huaja

Ministri takon homologun kuvajtian

Ministri i Drejtësisë, Bujar Nishani, siguroi dje zv.kryeministrin, njëkohësisht edhe ministër Drejtësie i shtetit të Kuvajtit, z. Rashid Abdulmohsen Al-Hammad, se legjislacioni shqiptar është një garanci e plotë për investimet e huaja. Ministri kuvajtian shoqërohej nga kryetari i Gjykatës së Apelit, deputetë të Parlamentit, gjyqtar dhe juristë. Pas urimeve të mirëseardhjes dhe përshëndetjeve miqësore nga të dyja palët, ministri i Drejtësisë, Bujar Nishani, bëri një panoramë të punës që ai ka bërë në drejtimin e Ministrisë së Drejtësisë. Mes shumë ligjeve të rëndësishme, ministri Nishani veçoi ligjin Për marrëdhëniet juridiksionale me autoritetet e huaja në çështjet penale, i cili është miratuar pak muaj më parë nga Parlamenti Shqiptar. Me anë të këtij ligji rregullohet dhe nxitet më tej bashkëpunimi juridiskional me vendet e ndryshme të botës, lehtësohet bashkëpunimi mes gjykatave të Shqipërisë dhe të gjitha vendeve të tjera, lehtësohet shkëmbimi i dokumenteve gjyqësore si dhe realizohet më shpejt përcjellja e letër-porosive, tha ministri në fjalën e tij, ndërkohë që i paraqiti zv.kryeministrit kuvajtian të gjithë gatishmërinë e tij për të thelluar më tej bashkëpunimin në këtë fushë mes ekspertëve të nivelit teknik. Më pas, ministri e njoftoi zv.kryeministrin mbi hapat që ka ndërmarrë Ministria e Drejtësisë në fushën e përmirësimit të legjislacionit për investimet e huaja në vend. Kemi bërë disa amendime për ligjin për investimet e huaja, për ti dhënë lehtësi biznesit që ai të ketë më shumë garanci kur të investojë në vendin tonë. Qëllimi i vetëm është ti nxisim bizneset të investojnë kapitalet e tyre në Shqipëri, sepse këtu do të gjejë një ambient miqësor, një legjislacion dhe rend të qartë dhe të konsoliduar, u shpreh Nishani. Zv.kryeministri njëkohësisht edhe ministër i Drejtësisë së Shtetit të Kuvajtit, shkëlqesia e tij, z. Rashid Abdulmohsen Al-Hammad, pasi shprehu admirimin e tij për bukuritë e Shqipërisë, i deklaroi ministrit gatishmërinë e tij për rritjen e bashkëpunimit në fushën e gjyqësorit nëpërmjet trajnimeve të përbashkëta, si dhe shprehu dëshirën për të nxitur më tej investimet kuvajtiane në një vend me legjislacion të konsoliduar dhe rend të sigurt si Shqipëria.