Nisma, “Një qytetar–një pemë”, Bashkia e Tiranës ka mbjellë 4000 pemë

Nisma e ndërmarrë nga Bashkia e Tiranës “Një qytetar–një pemë” ka gjetur përkrahje të gjerë në komunitetin kryeqytetas. Janë të shumta kompanitë private, shoqatat jo fitimprurëse, agjencitë, bizneset e mëdha dhe të vogla, donatorë vendas e të huaj, shoqëritë e ndryshme, por edhe vetë qytetarët, të cilët, në mënyrë vullnetare janë bërë pjesë e kësaj iniciative, duke kontribuar në shtimin e hapësirave të gjelbra në kryeqytet. Kjo nismë e dobishme mjedisore po vazhdon me sukses bashkëpunimet me partnerët brenda dhe jashtë vendit. Kësaj radhe, “Raiffeisen Bank” sh.a i është bashkuar iniciativës, duke realizuar në lulishten para Galerisë së Arteve mbjelljen e 5 pishave, 2 palmave dhe 2 bredhave si dhe duke dhënë një kontribut të vyer, në shtimin e përmasës së gjelbër të qytetit. Kryebashkiaku Rama, i pranishëm në aktivitet e konsideroi shumë të rëndësishëm për kryeqytetin, lajmin e mbjelljes së 4000 pemëve të deritanishme, duke përcjellë njëkohësisht synimin për ta çuar në 4500 këtë numër, përpara sezonit të ardhshëm të mbjelljeve.

27 Prill 2010