Një amerikanojugore fiton Kupën e Botës 2010, e thotë historia

Jashtë fushe “Libri i Artë” tregon se trofeu kalon në mënyrë sistematike nga europianët te latinët

Për të parashikuar cila skuadër do ta fitojë Botërorin 2010, nuk nevojitet asnjë magji, apo sfera nëpërmjet së cilës shihet e ardhmja. Mjafton të shfletosh “Librin e Artë” të aktivitetit më prestigjioz, për të krijuar një ide se çfarë pritet të ndodhë. Prej afro 50 vitesh, Kupa e Botës shkëmbehet në mënyrë sistematike ndërmjet përfaqësueseve europiane dhe atyre nga Amerika Jugore. Që prej edicionit të vitit 1962 të zhvilluar në Kili e deri në atë të mbajtur në vitin 2006 në Gjermani, zbulohet ligji i pashkruar se trofeu transferohet lart e poshtë vetëm në këto dy kontinente. Historia nis me fitoren e Brazilit në ‘62; katër vjet më pas vjen triumfi i Anglisë, ndërsa në edicionin pasardhës janë sërish Pele dhe yjet e tjerë të “seleçaos” që marrin trofeun në vitin 1970. Gjermania e rikthen kupën në Europë, ndërsa Argjentina e rimerr (në emër të amerikanojugorëve) në vitin 1978. Pjesa tjetër është pak a shumë historia e futbollit modern, ndërsa botërori fitohet nga Italia, Argjentina, Gjermania, Brazili, Franca, sërish Brazili dhe në fund nga Italia. Rituali është përsëritur me përpikëri të jashtëzakonshme: Europë, Amerika Jugore, Europë, Amerika Jugore…

Nëse rrjedha e ngjarjeve i qëndron besnike historisë, është e lehtë të imagjinosh se çfarë do të ndodhë: tashmë radhën e ka një përfaqësuese nga Amerika e Jugut, ndërsa si pretendente cilësohen Argjentina dhe Brazili. “Seleçao” është favorite, duke qenë se ka arritur të triumfojë në të gjitha kontinentet ku është zhvilluar turneu: Europë (Suedi 1958), Azi (Kore dhe Japoni 2002), Amerika Veriore (SHBA 1994) dhe Amerika Jugore (Kili 1962 dhe Meksikë 1970). Por, ekziston një kuriozitet që shqetëson skuadrën e Dungës: Brazili dhe Argjentina e kanë fituar kupën me “dopietë”, në distancë 8 vjet njëra nga tjetra. Sipas llogarive, tashmë është radha e argjentinasve. Me fjalë të tjera, përfaqësueset si Spanja, Anglia apo Gjermania, që shpresojnë te fitorja, mund të fillojnë të bëjnë gati valixhet për t’u kthyer në shtëpi.

Më shumë nga Sporti