Nuk pranoi faturën e energjisë, godet dy punonjëset e KESH-it
FIER – Godet punonjëset e KESH-it se nuk pranonte faturën e energjisë, arrestohet 36-vjeçari. Ka qenë ora 16:00 e së enjtes, në mbyllje të orarit zyrtar të punës, kur dy punonjëset janë kanosur dhe më pas goditur nga Arben Dafa, banor i fshatit Sheqishtë të Fierit. E gjithë ngjarja ka marrë startin kur 36- vjeçari është paraqitur pranë zyrave të Albapostës për të pagur faturat e energjisë elektrike, por kur i ka parë nuk ka qenë dakord me to. Dy punonjëset, përkatësisht N.K. me banim në qytetin e Patosit dhe me detyrë arkëtare në Albaposta dhe V.G. banore e fshatit Zharrëz me detyrë faturiste e energjisë elektrike, kanë tentuar t’i mbushin mendjen Dafës se fatura shkruante realisht atë që ai kishte konsumuar. I bindur se shuma e vendosur në faturë ishte fiktive, 36-vjeçari fillimisht ka ngritur zërin ndaj dy punonjësve, ndërkohë që është acaruar më shumë kur zyrtaret vazhdimisht hidhnin poshtë mendimin e tij për faturimin e padrejtë të energjisë. E ndërsa punonjëset këmbëngulnin se fatura ishte reale, Dafa i acaruar së tepërmi i ka goditur ato duke përhapur frikë dhe panik te punonjëset. Menjëherë pas veprimit aspak të hijshëm dhe kërcënues të Dafës, dy punonjëset kanë bërë edhe denoncimin e rastit në komisariatin e Fierit. Të mbërritur menjëherë në vendin e ngjarjes, uniformat blu kanë bërë ndalimin e 36-vjeçarit Arben Dafa nën akuzën e goditjes për shkak të detyrës. Autori mësohet nga policia se kishte dy muaj pa paguar energjinë elektrike dhe shuma ishte rreth 17 mijë lekë. m.r